अहिल्यानगर : महाराष्ट्र विधानसभा निवडणूक 2024 चे (Maharashtra Assembly Elections 2024) बिगुल वाजल्यानंतर श्रीरामपूर विधानसभा मतदारसंघ (Shrirampur Assembly Constituency) राज्यभरात चर्चेत आला आहे. कारण या मतदारसंघात महायुतीकडून (Mahayuti) दोन उमेदवार निवडणुकीच्या रिंगणात आहेत. राष्ट्रवादी अजित पवार गटाकडून (NCP Ajit Pawar Group) लहू कानडे (Lahu Kanade) तर शिवसेना शिंदे गटाकडून (Shiv Sena Shinde Group) भाऊसाहेब कांबळे (Bhausaheb Kamble) मैदानात आहेत. त्यामुळे या मतदारसंघात महायुतीचा अधिकृत उमेदवार कोण? याबाबत चर्चांना उधाण आले आहे. त्यातच काल मुख्यमंत्री एकनाथ शिंदे (Eknath Shinde) यांची भाऊसाहेब कांबळे यांच्या प्रचारासाठी श्रीरामपूरमध्ये सभा होणार होती. मात्र मुख्यमंत्र्यांची सभा अचानक रद्द करण्यात आली. यानंतर भाऊसाहेब कांबळे यांचा रक्तदाब अचानक वाढल्याने त्यांना रुग्णालयात दाखल करण्यात आले. तर आज उपमुख्यमंत्री अजित पवार हे लहू कानडे यांच्या प्रचारासाठी श्रीरामपूरमध्ये दाखल झाले आहे. अजित पवार (Ajit Pawar) यांच्या सभेआधीच त्यांनी श्रीरामपूरमध्ये मोठी खेळी खेळली आहे.
अजित पवार श्रीरामपूरचे माजी आमदार भानुदास मुरकुटेंच्या घरी दाखल झाले. सभेला जाण्याअगोदर अजितदादांनी घेतली भानुदास मुरकुटे यांच्या कुटुंबीयांची श्रीरामपूरातील निवासस्थानी जाऊन भेट घेतली. माजी आमदार भानुदास मुरकुटे एका प्रकरणात महिनाभरापासून जेलमध्ये आहेत. आज अजित पवार यांनी भानुदास मुरकुटे यांचा मुलगा सिद्धार्थ मुरकुटे याची भेट घेत चर्चा केली. त्यामुळे अजित पवारांच्या भेटीनंतर मुरकुटे हे कानडे यांना पाठिंबा देणार का? असा चर्चांना आता उधाण आले आहे. मात्र अजित पवार यांची भेट कौटुंबिक होती. यात कुठलीही राजकीय चर्चा झाली नसल्याची प्रतिक्रिया सिद्धार्थ मुरकुटे यांनी दिली आहे.
लहू कानडेंचा बाळासाहेब थोरातांना टोला
दरम्यान, श्रीरामपूर येथील सभेत लहू कानडे म्हणाले की, मंडप लहान पडला. त्यामुळे अनेकांना उन्हात उभ राहावं लागलं, त्याबद्दल दिलगिरी व्यक्त करतो. महायुतीचा अधिकृत उमेदवार म्हणून मी निवडणुकीला सामोरे जात आहे. 2019 ला काँग्रेसकडे उमेदवार नव्हता त्यांनी आपल्याला गळ घातली आणि उमेदवारी केली. मी आमदार झाल्यावर अजयदादांनी मला तुम्ही माझ्या जवळचे आमदार आहात, असे आवर्जून सांगितले होते. मी काँग्रेसचा प्रामाणिक असताना आणि मान उंचावेल असे काम केलेले असताना काँग्रेसने विश्वासघात केला. मात्र, काही मंडळींनी वरिष्ठांचे कान भरले आणि माझी उमेदवारी डावलली. महायुतीतील सर्व नेत्यांशी विचार विनिमय करून मला महायुतीची उमेदवारी अजितदादांनी दिली. माझी घर का ना घाट का अशी अवस्था काँग्रेसने केली होती. ज्या लोकांनी मला एकटं पाडण्याचा प्रयत्न केला त्यांच्या बुद्धीची किव येते. माझ्यासोबत असणारे काँग्रेसचे हजारो कार्यकर्ते आज राष्ट्रवादीत प्रवेश करत आहे, असे म्हणत त्यांनी बाळासाहेब थोरात यांना न घेता टोला लगावला. काँग्रेसमध्ये राहिलो असतो तर हिरवळीतले साप डसल्याशिवाय राहिले नसते, असेही लहू कानडे यांनी म्हटले.
आणखी वाचा