Jammu Kashmir Vidhan Sabha Results 2024: जम्मू आणि काश्मीरमधील विधानसभेच्या (Jammu Kashmir Vidhan Sabha Results 2024) 90 जागांसाठी सध्या मतमोजणी सुरू आहे. जम्मू आणि काश्मीरच्या या विधानसभा निवडणुकीत काँग्रेस-नॅशनल कॉन्फरन्स आघाडी, पीपल्स डेमोक्रॅटिक पार्टी (पीडीपी) आणि भारतीय जनता पक्ष यांच्यात मुख्य लढत आहे. जम्मू आणि काश्मीरमधील जवळपास सर्व मतमोजणीचे सर्व कल हाती आले आहेत.
जम्मू आणि काश्मीरमधील (Jammu Kashmir Vidhan Sabha Results 2024) 90 जागांपौकी सध्या नॅशनल कॉन्फरन्स 35, भाजप 28, काँग्रेस 14, पीडीपी 3 आणि इतर 10 जागांवर आघाडीवर आहे. भाजपसाठी जम्मू आणि काश्मीरची ही निवडणूक महत्वाची होती. कारण जम्मू-काश्मीरला केंद्रशासित प्रदेश बनवल्यानंतर आणि तेथून कलम 370 हटवल्यानंतर ही निवडणूक झाली. कलम 370 हटविल्यानंतर तत्कालीन जम्मू आणि कश्मीर राज्यापासून लडाख आणि लेह यांना वेगळे करुन केंद्र शासित प्रदेशात त्याचे रुपांतर करण्यात आल्याने याचा भाजपला फायदा होईल, असा अंदाज वर्तवण्यात येत होता. मात्र जम्मूमध्ये भाजपला अल्प प्रतिसाद मिळाला, तर काश्मीर खोऱ्यातही भाजपची झोळी रिकामीच राहणार असल्याचं दिसून येत आहे.
भाजपचे जम्मू मिशन अयशस्वी?
जम्मू-काश्मीरमधील कल पाहता भाजपचे जम्मूतील ध्येय पूर्णपणे फसल्याचे दिसते. वास्तविक, 2014 च्या विधानसभा निवडणुकीपर्यंत जम्मू-काश्मीरमध्ये एकूण 111 जागा होत्या. त्यापैकी 46 जागा काश्मीरमध्ये आणि 37 जागा जम्मूमध्ये होत्या. तर चार जागा लडाखच्या खात्यात गेल्या. याशिवाय 24 जागा पीओकेमध्ये येतात. लडाख वेगळे झाल्यानंतर जम्मू-काश्मीरमध्ये फक्त 107 जागा उरल्या होत्या. अशा परिस्थितीत, नवीन परिसीमन अंतर्गत, जम्मू-काश्मीरमध्ये 114 जागा कमी करण्यात आल्या, त्यापैकी 90 जागा जम्मू-काश्मीरमध्ये आणि 24 जागा पीओकेमध्ये ठेवण्यात आल्या. जम्मू-काश्मीरमध्येही 43 जागा जम्मू आणि 47 जागा काश्मीरला गेल्या. म्हणजेच नव्या परिसीमानुसार जम्मूमध्ये सहा जागा वाढल्या, तर काश्मीरमध्ये फक्त एक जागा वाढली. आता 2014 च्या विधानसभा निवडणुकांवर नजर टाकली तर भाजपने जम्मूमध्ये 37 पैकी 25 जागा जिंकल्या होत्या. आता जम्मूमध्ये 43 जागा असूनही भाजप केवळ 24 जागांवरच पुढे असल्याचे दिसत आहे.
नॅशनल कॉन्फरन्सची ऐतिहासिक कामगिरी-
जम्मू-काश्मीरमध्ये नॅशनल कॉन्फरन्सची ऐतिहासिक कामगिरी केली आहे. गेल्या निवडणुकीच्या तुलनेत कामगिरीत तिप्पट सुधारणा असल्याचं दिसून येत आहे. 2014 ला नॅशनल कॉन्फरन्सला 15 जागा, यावेळी 35 जागांपेक्षा अधिक जागा जिंकत असल्याचं दिसून येत आहे. जम्मू-काश्मीरमध्ये भाजपच्या कामगिरीतही ऐतिहासिक सुधारणा झाली आहे. भाजपला गेल्यावेळी 25 जागा जिंकल्या होत्या, यावेळी 28 जाग जिंकण्याची शक्यता आहे. या निवडणुकीत पीडीपीचा मात्र अभूतपूर्व दारुण पराभव होत असल्याचं दिसत आहे. 2014 ला 28 जागा जिंकणाऱ्या पीडीपीला यावेळी दोनच जागा जिंकणं शक्य असल्याचं सध्याच्या कलानूसार दिसत आहे.