गोंदिया : लाडकी बहीण योजनेचा पैसा कुणाच्या बापाचा नाही. सर्वसामान्य जनता कष्टाच्या पैशातून टॅक्स भरते त्या मेहनतीचा पैसा आहे, असं बच्चू कडू यांनी म्हटलं आहे. खासदार धनंजय महाडिक यांच्या वादग्रस्त वक्तव्यावर प्रहारचे अध्यक्ष बच्चू कडू यांनी प्रतिक्रिया दिली आहे. याशिवाय बच्चू कडू यांनी प्रफुल पटेल यांना देखील सुनावलं आहे.
भाजपचे खासदार धनंजय महाडिक यांनी वादग्रस्त वक्तव्य केलं असून लाडकी बहीण योजनेच्या लाभार्थी हे काँग्रेसच्या सभेमध्ये दिसत असतील तर त्यांचे फोटो काढा आणि आम्हाला सांगा आम्ही त्यांची व्यवस्था करु असं म्हटलं होतं. त्यावर बोलताना प्रहार जनशक्ती पक्षाचे बच्चू कडू म्हणाले की हा पैसा का त्यांच्या बापाचा नाही. सर्वसामान्य नागरिक जे टॅक्स भरतात त्याचा हा पैसा आहे, त्यांच्या बापाचा हा पैसा नाही. लाडकी बहीण योजना कोणी मागितली होती,आम्ही दुधाला भाव मागितला. आम्ही धान पिकाला भाव मागितला होता. पण ते सरकारला जमलं नाही. मतासाठी लाडकी बहीण योजना सुरू करता ही लाडकी बहीण तुम्हाला आता धडा शिकवल्याशिवाय राहणार नाही अशी खणखणीत टीका त्यांनी धनंजय महाडिक यांच्यासह राज्य सरकारवर केली आहे.
प्रफुल पटेल यांच्या घरासमोर आंदोलन करणार
प्रफुल पटेल यांनी धमक्या देऊ नये अन्यथा त्यांच्या घरासमोर आंदोलन करू असा इशारा देखील बच्चू कडू यांनी दिला. प्रफुल पटेल यांनी आम्हाला आंडु पांडू समजू नये, असं बच्चू कडू म्हणाले. प्रफुल पटेल यांनी अर्जुनी मोरगावचे आमदार मनोहर चंद्रिकापुरे यांना उद्देशून म्हटले होते की या भागातल्या ठेकेदारांचे पैसे राज्य सरकार थांबवेल या वक्तव्याच्या समाचार घेताना बच्चू कडू म्हणाले की प्रफुल पटेल सारखा माणूस धमक्या देत असेल तर आम्ही आंडू पांडू नाही. पुन्हा धमकी दिली तर आम्ही त्यांच्या घरावर जाऊ असं बच्चू कडू म्हणाले.
प्रफुल पटेल यांनी समजावून घ्यावं त्यांनी मर्यादेत राहावं तर आम्ही मर्यादेत राहू... त्यांनी मर्यादा सोडली तर आम्ही त्याच्यापेक्षा भारी आहोत, असे टीकास्त्र त्यांनी प्रफुल पटेल यांच्यावर सोडले. प्रफुल पटेल हे गेल्या काही दिवसापासून गोंदिया जिल्ह्यामध्ये ठाण मांडून बसले आहेत त्यावर बोलताना बच्चू कडू म्हणाले की.. प्रफुल पटेल विकासासाठी ठाण मांडून बसले असते तर एवढी गरज पडली नसती. तुम्ही केंद्रीय मंत्री होते तुमच्याजवळ अलटून-पाटून तुमच्याकडे सत्ता आली. सत्ते शिवाय तुम्ही राहू शकत नाही पण विकास कामांचा डोंगर तुम्हाला उभारता आला नाही, अशी बोचरी टीका त्यांनी प्रफुल पटेल यांच्यावर केली.
इतर बातम्या :