अण्णाद्रमुक आणि द्रमुक या दोन्ही पक्षांनी जाहीरनाम्याद्वारे मतदारांना आपल्याकडे आकर्षिक करण्याचा पुरेपूर प्रयत्न केला आहे. परंतु राजीव गांधी यांच्या मारेकऱ्यांची सुटका करण्याचे धक्कादायक आश्वासनदेखील दिले आहे. तसेच नोटाबंदीदरम्यान मृत्युमुखी पडलेल्या व्यक्तींच्या कुटुंबीयांना भरपाई देण्याचेही आश्वासन देण्यात आले आहे.
याआधी अनेकदा डीएमकेने तामिळनाडू राज्य सरकार आणि राज्यपालांकडे या प्रकरणातील दोषींच्या सुटकेची मागणी केली आहे. आज सत्ताधारी आणि विरोधी या दोन्ही पक्षांच्या जाहीरनाम्यांमुळे नवा वाद निर्माण झाला आहे.
राजीव गांधींचे मारेकरी 28 वर्षांपासून तुरुंगात
21 मे 1991 रोजी तामिळनाडूमधील श्रीपेरंबदूर येथे राजीव गांधी यांची हत्या करण्यात आली होती. याप्रकरणी सात जण गेल्या 28 वर्षांपासून तुरुंगात आहेत. गेल्यावर्षी सप्टेंबरमध्ये तामिळनाडू सरकारने राज्यपाल बनवारीलाल पुरोहित यांच्याकडे दोषींची सुटका करण्याची परवानगी मागितली होती.