नागपूरः आगामी 2022-2023 शैक्षणिक सत्राला सुरुवात झाली आहे. पहिली ते दहावीपर्यंत मुलांच्या प्रवेशासाठी पालकांची धावपळ सुरु झाली आहे. मात्र अनधिकृत शाळांची निवड केल्यास पुढे पाल्यांची फसगत होऊ शकते. जिल्हा परिषदेच्या शिक्षण विभागाने नागपूर शहरात आणि ग्रामीण भागात अनधिकृतपणे सुरु असलेल्या 22 शाळांची यादी जाहीर केली आहे. या शाळांमध्ये चुकूनही मुलांचे प्रवेश करू नका, असे आवाहन विभागाने केले आहे. प्राथमिकच्या शिक्षणाधिकारी रोहिणी कुंभार यांनी याबाबत परिपत्रक काढले आहे. या शाळांमध्ये प्रवेश घेतल्यास शिक्षण विभाग जबाबदार राहणार नाही, असा इशाराच विभागाने दिला आहे.
व्यवस्थापनाला एक लाखांचा दंड
अनधिकृत शाळांमध्ये सर्वाधिक शाळा या हिंगणा तालुक्यातील आहे बालकांचा मोफत व सक्तीच्या शिक्षणाचा अधिकार अधिनियम 2009 मधील कलम 18 नुसार कुठलेही व्यवस्थापन विनापरवानगी शाळा सुरु करु शकत नाही, अन्यथा त्या कलम 18 (5) नुसार कारवाई पात्र आहे. या सर्व शाळांवर दंडात्मक कारवाई सुरु आहे. संबंधित अनधिकृत शाळा सुरु राहिल्यास व्यवस्थापनास एक लाखांचा दंड व सूचना देऊनही शाळा बंद न केल्यास प्रतिदिवस 10 हजारांचा दंड ठोठविण्यात येणार आहे. पालकांनी आपल्या पाल्याचा या शाळांमध्ये प्रवेश घेऊ नये, त्यांचे शैक्षणिक नुकसान झाल्यास ही जबाबदारी पालकांची राहील, असेही शिक्षणाधिकारी कुंभार यांनी कळविले आहे.
या शाळा अनधिकृत
विनापरवानगी सुरु असलेल्या ग्रामीण भागातील शाळांमध्ये काटोल तालुक्यातील सनशाइन इंग्लिश मीडियम स्कूल पंचवटी, कामठी तालुक्यातील बुद्धिस्ट इंटरनॅश्नल स्कूल येरखेडा, त्रिमूर्ती पब्लिक कॉन्व्हेंट बाजारगाव, सिद्धिविनायक स्कूल बुटीबोरी, तथास्तु इंग्लिश स्कूल बेलतरोडी, न्यू प्रेरणा कॉन्व्हेंट टाकळघाट, ब्रिलियंट इंग्लिश स्कूल वानाडोंगरी, सार्थक इंग्लिश स्कूल राजीवनगर, एस.के. इंटरनॅशनल स्कूल इसासनी, क्रांतीज्योती सावित्रिबाई फुले कॉन्व्हेंट सिर्सी, उमरेड यांचा समावेश आहे.
शहरातील या शाळा अनधिकृत
नागपूर शहर हद्दीतील अनधिकृत शाळांमध्ये एक्सल इंटरनॅश्नल स्कूल कळमना, दी बुद्धिस्ट इंटरनॅशनल स्कूल दाभा, दी बुद्धिस्ट इंटरनॅशनल स्कूल इंदोरा, मदर्स किड्स स्कूल बिनाकी, एलिझाबेथ कॉन्व्हेंट सेमिनरी हिल्स, दार-ए-मदिना इंग्लिश स्कूल शांतिनगर, मदरसा दारुलम तजुलवरा गर्ल्स गांधीबाग, मदरसा दारुलम तजुलवरा बॉईज गांधीबाग, न्यू रहेमानिया इंग्लिश प्रायमरी स्कूील मोमीनपुरा याचा समावेश आहे.
Education Loan Information:
Calculate Education Loan EMI