Nashik Crime News: नाशिक शहरातील एका नामांकित बहुराष्ट्रीय आयटी (IT) कंपनीत समोर आलेल्या महिलांचे लैंगिक शोषण आणि सक्तीच्या धर्मांतरण प्रकरणाने आता अधिक भीषण वळण घेतले आहे. या प्रकरणाचा तपास करणाऱ्या विशेष तपास पथकाला (SIT) एका माजी कर्मचाऱ्याने दिलेल्या माहितीमुळे तपासाची व्याप्ती वाढली आहे. आरोपी हे केवळ काम करण्यासाठी नाही, तर त्यांचे 'विशिष्ट मनसुबे' पूर्ण करण्यासाठी सुटीनंतरही कंपनीत संशयास्पद हालचाली करत असल्याची माहिती समोर आली आहे.
Nashik Crime News: 2022 पासून कट्टरतेचे जाळे?
एसआयटीला संशय आहे की, मुख्य आरोपींनी 2022 पासूनच कंपनीत कट्टरतेचे विचार रुजवण्यासाठी आणि विशिष्ट धर्माच्या प्रसारासाठी जाळे विणण्यास सुरुवात केली होती. केवळ कामाच्या नावाखाली कंपनीच्या मालमत्तेचा आणि वेळेचा वापर करून काही महिला कर्मचाऱ्यांना मानसिक दबावाखाली ठेवले जात होते. तर आपले मनसुबे पूर्ण करण्यासाठी संशयित काम संपल्यावर घरी न जाता कंपनीत विशिष्ट हालचाली करायचे, अशी माहिती एका माजी कर्मचाऱ्याने एसआयटीला दिल्याची माहिती समोर येत आहे.
आता महिलांचे लैंगिक आणि धर्मांतर प्रयत्न प्रकरणाची तपासणी वेगाने सुरू आहे. संशयितांना देशाबाहेरील व्यक्ती / संघटनांकडून फंडिंग होते का? याबाबतचा तपास एसआयटीकडून सुरू सुरु आहे. तर कंपनीमधील संशयितांच्या बँक खात्यांची देखील एसआयटीकडून चौकशी केली आहे. तसेच ई-मेल, चॅट्स, कॉल रेकॉर्ड, धमक्या यांची देखील तपासणी सुरू असल्याची माहिती समोर येत आहे.
Nashik Crime News: अश्विनी चैनानीच्या कोठडीत वाढ
दरम्यान, या प्रकरणातील महत्त्वाची संशयित आणि कंपनीची एजीएम अश्विनी चैनानी हिच्या पोलीस कोठडीत नाशिक न्यायालयाने 15 एप्रिलपर्यंत वाढ केली आहे. तपासात धक्कादायक बाबी समोर आल्या आहेत. कंपनीच्या सर्व्हरवरून चैनानीला पाठवलेले 78 ई-मेल्स तपासाच्या रडारवर आहेत. हे ई-मेल्स पीडितांच्या तक्रारींचे होते की गुन्ह्याचा कट रचण्यासाठी, याचा शोध सुरू आहे. चैनानी आणि मुख्य संशयित तौसिफ अत्तार यांच्यात गेल्या दोन वर्षांत 38 वेळा संभाषण झाले आहे. दानिश शेख आणि रझा मेमन या संशयितांशीही ती नियमित संपर्कात होती. पीडितेने विनयभंगाची तक्रार केली असता, तिला मदत करण्याऐवजी "तुमको क्या हायलाईट होना है?" असे म्हणत चैनानीने तिचा आवाज दाबल्याचा आरोप सरकारी वकिलांनी केला आहे.
Nashik Crime News: पॉश समितीच्या भूमिकेवर प्रश्नचिन्ह
आश्विनी चैनानी या लैंगिक छळ प्रतिबंधक समितीच्या (पॉश) सदस्य असतानाही 2023 पासून सुरू असलेल्या अत्याचारांकडे त्यांनी दुर्लक्ष का केले, असा सवाल आता उपस्थित केला जात आहे. पीडितेवर मानसिक दबाव टाकून तिला हतबल करण्यात चैनानी यांची मोठी भूमिका असल्याचा संशय बळावला आहे.
आणखी वाचा