ठाणे: प्रेमप्रकरणात झालेल्या वादातून प्रेयसीची हत्या करत एक तरुण थेट मानपाडा पोलीस ठाण्यात पोहचला आणि तिथे त्याने हत्येची कबुली दिली. त्याने सांगितलेला हा प्रकार ऐकून पोलीसदेखील स्तब्ध झाले. आज सकाळी 11 वाजण्याच्या सुमारास डोंबिवली कल्याण शीळ रोड, टाटा नाका परिसरात ही घटना घडली. मानपाडा पोलिसांनी आरोपी संदीप अहिरेला ताब्यात घेत पुढील तपास सुरु केला आहे.
डोंबिवलीतील मानपाडा पोलिस ठाण्यात जवळपास दोन वाजताच्या सुमारास एक तरुण आला. या तरुणाने मी शेजारी राहणाऱ्या महिलेची हत्या करुन पोलिस ठाण्यात आलो आहे असे सांगितले. हे ऐकताच पोलिस हैराण झाले. डोंबिवलीचे एसीपी सुनिल कुऱ्हाडे आणि वरिष्ठ पोलिस निरीक्षक शेखर बागडे यांच्या मार्गदर्शनाखाली तपास सुरु झाला.
कल्याण शीळ रोड येथे टाटा नाका परिसरातील श्रीहरी चाळीत राहणाऱ्या वैशाली मस्तूद या 40 महिलेची तिचा शेजारी राहणारा संदीप अहिरे याने ब्लेडचा वापर करत गळा चिरून हत्या केली. दरम्यान, वैशाली मस्तूद ही विवाहित होती. संदीप अहिरे तिच्या शेजारी राहत होता. वैशाली मस्तूद आणि संदीप अहिरे यांच्यात प्रेमसंबंध होते.
प्रेमसंबंधातून या दोघांमध्ये वाद झाले होते. या वादातून संतापलेल्या संदीपने आज सकाळी 11 वाजण्याच्या सुमारास तिचे घर गाठले. त्यावेळी तिच्या घरात कुणीही नव्हते. या दोघांमध्ये वाद झाला. नंतर संतापलेल्या संदीपने ब्लेडने वैशालीचा गळा चिरून तिची हत्या केली. यावेळी वैशालीचा जागीच मृत्यू झाला. त्यानंतर रक्ताच्या थारोळ्यात पडलेल्या वैशालीला तिथे सोडून संदीपने थेट मानपाडा पोलिस ठाणे गाठले आणि तिथे पोलिसांना आपण केलेल्या या कृत्याची कबुली दिली. पोलिसांनी संदीप अहिरेला ताब्यात घेत त्याच्या विरोधात गुन्हा दाखल करण्याची प्रक्रिया सुरू केली आहे.
अंगावर थुंकल्याने दोघांमध्ये हाणामारी, डोंबिवलीत एकाचा मृत्यू
डोंबिवलीतील गुन्ह्यांच्या संख्येत सातत्याने वाढच होताना दिसत आहे. दोन दिवसांपूर्वी रस्त्यावर थुंकणे एकाच्या जीवावर बेतल्याची घटना समोर आली आहे. पादचाऱ्याने बाईकस्वारावर थुंकल्यामुळे दोघांमध्ये वाद झाला. काही क्षणातच वादाचे रूपांतर हाणामारीत झालं. या हाणामारीत बाईकस्वाराचा मृत्यू झाल्याची दुर्दैवी घटना डोंबिवलीतील राजू नगर परिसरात घडली. ही हाणामारीची घटना सीसीटिव्ही कॅमेरात कैद झाली आहे. याप्रकरणी विष्णू नगर पोलीस ठाण्यात कैफ खान याच्या विरोधात गुन्हा दाखल करण्यात आला असून पोलिसांनी त्याला अटक केली आहे. विजय पाटवा असे या मृत्यू झालेल्या इसमाचे नाव आहे.