मुंबई : मुंबई विद्यापिठाचे (Mumbai University) माजी कुलगुरु डॉ. अशोक प्रधान यांच्यावर काहींनी घरात घुसून हल्ला केलाय. हे हल्लेखोर निलंबित प्राध्यापक असल्याची माहिती आहे. या हल्ल्यात डॉ. प्रधान हे गंभीर जखमी झालेत. याप्रकरणी सहा जणांवर गुन्हा दाखल करण्यात आला आहे. डॉ. प्रधान यांनी चार वर्षांपूर्वी शैक्षणिक संस्थेतील या हल्लेखोर प्राध्यापकांचे गैरवर्तन आणि कामाबद्दल संस्थेच्या अनेक शाखांनी तक्रारी केल्यामुळे त्यांना कामावरून निलंबित केले होते. याच वादातून या कुलगुरुंना मारहाण झाल्याची प्राथमिक माहिती आहे.
कल्याण पश्चिम भागातील कर्णिक रोडवरील कुलगुरुंच्या ही घटना घडली आहे. याप्रकरणी महात्मा फुले चौक पोलीस ठाण्यात हल्लेखोरांविरोधात विविध कलामानुसार गुन्हा दाखल करून पोलिसांनी तपास सुरू केला आहे. डॉ. अशोक प्रधान असे हल्लेखोरांच्या हल्ल्यात जखमी माजी कुलगुरूंचे नाव आहे. तर निलंबित प्राध्यापक संजय जाधव (वय 50), त्याचा साथीदार संदेश जाधव (वय 32), एक अल्पवयीन आणि एका महिलेसह दोन अनोळखी पुरुष अशी आरोपींची नावे आहेत.
आरोपीला चार वर्षापूर्वी केले होते निलंबीत
पोलिसांनी दिलेल्या माहितीनुसार डॉ. अशोक प्रधान हे मुंबई विद्यापीठातून निवृत्तीनंतर तो गेल्या काही वर्षांपासून समिती सदस्य म्हणून दुसऱ्या शिक्षण समितीचे पदाधिकारी म्हणून कार्यरत आहेत. डॉ. प्रधान यांनी चार वर्षांपूर्वी त्या शैक्षणिक संस्थेतील हल्लेखोर प्राध्यापकाचे गैरवर्तन आणि अनैतिक कामाबद्दल संस्थेच्या अनेक शाखांनी तक्रारी केल्यामुळे त्यांना कामावरून निलंबित केले होते. त्यामुळे प्राध्यापकाचे वेतन घेणाऱ्या आरोपीचे वेतन बंद झाल्याने त्यांना आर्थिक फटका बसला होता.
नोकरीवर परत रूजू घेण्यास नकार दिल्याने केला हल्ला
याच वादातून रविवारी संध्याकाळच्या सुमारास मुख्य आरोपी इतर चार जणांसह प्रधान यांच्या बंगल्यात गेले होते. त्यावेळी बंगल्यात आरोपी प्राध्यापकाने मला नोकरीची खरोखरच गरज आहे. म्हणून मला पुन्हा नोकरीवर रुजू करून घ्या. असा तगादा डॉ. प्रधानकडे लावला होता. त्यावेळी प्रधान आणि त्यांची पत्नी घरात होत्या. मात्र डॉ. प्रधान यांनी नोकरी घेण्यास नकार दिल्याने वाद होऊन काही क्षणातच आरोपी जाधव यांनी डॉ. प्रधानांवर हल्ला केला.
दरम्यान, डॉ. प्रधान यांच्या पत्नीने ताबडतोब पोलिसांना बोलावले. त्यानंतर महात्मा फुले पोलिस स्टेशनचे एक पथक प्रधान यांच्या बंगल्यावर पोहोचले, त्यांना रुग्णालयात नेले जेथे त्यांच्यावर उपचार करण्यात आले. उपचारानंतर त्यांना घरी सोडण्यात आले. दुसरीकडे महात्मा फुले चौक पोलीस ठाण्यात भादंवि कलम 143, 147, 452, 341, 504, 34 अन्वये सहा हल्लेखोरांवर गुन्हा दाखल करण्यात आला आहे.