Ambernath Murder: 12 वर्षानंतरही मूलबाळ नाही... पतीने उचललं टोकाचं पाऊल, डोक्यात अवजड वस्तू घालून पत्नीला संपवलं

Ambernath News: लग्नाला 12 वर्ष झाली, तरी त्यांना मूलबाळ होत नसल्यानं नीतू कुमारीची आयव्हीएफ ट्रीटमेंटही सुरू होती. मात्र रोनीतराज हा याच कारणावरून तिच्या चारित्र्यावर संशय घेत नेहमी तिच्याशी वाद घालत होता.

अंबरनाथ : लग्नाला 12 वर्ष होऊनही मूलबाळ होत नसल्यानं पतीनं पत्नीची डोक्यात वार करून हत्या केली. अंबरनाथच्या (Ambernath Murder)  ऑर्डनन्स इस्टेटमध्ये हा धक्कादायक प्रकार घडला. आहे.  रोनीतराज मंडल असं या आरोपीचं नाव आहे. हत्या केल्यानंतर त्याने  बनाव रचला. पोलिसांच्या तपासात मात्र त्याचा बनाव उघडा पडला आणि त्याला तात्काळ बेड्या ठोकण्यात आल्या आहेत. या घटनेनंतर परिसरात मोठी खळबळ उडाली आहे. 

चारित्र्यावर संशय घेत पत्नीशी नेहमी वाद

अंबरनाथच्या ऑर्डनन्स इस्टेटमधील एमपीएफ मैदानासमोर रोनीतराज मंडल (37) हा पत्नी नीतू कुमारी मंडल (30) सोबत वास्तव्याला होता. मूळच्या बिहारमधील असलेल्या या दोघांचं 2011 साली लग्न झालं होतं, तर 2016 साली रोनीतराज हा ऑर्डनन्स फॅक्टरीच्या अंबरनाथमधील मशीन टूल प्रोटोटाईप फॅक्टरीत फिटर म्हणून कामाला लागला. ऑर्डनन्स इस्टेटमधील एच 38 या स्टाफ क्वार्टरमध्ये हे दाम्पत्य राहायला होतं. त्यांच्या लग्नाला 12 वर्ष झाली, तरी त्यांना मूलबाळ होत नसल्यानं नीतू कुमारीची आयव्हीएफ ट्रीटमेंटही सुरू होती. मात्र रोनीतराज हा याच कारणावरून तिच्या चारित्र्यावर संशय घेत नेहमी तिच्याशी वाद घालत होता. अखेर संशयाने नीतू कुमारीचा जीव गेला.  

हत्येचा बनाव रचला

रविवारी दुपारी रोनीतराज याने मद्यपान केल्यानंतर तो जेवत असताना त्याचे पत्नीसोबत पुन्हा वाद झाले. या वादातून त्याने पत्नीच्या डोक्यात अवजड वस्तू मारून तिची हत्या केली. यानंतर संध्याकाळच्या सुमारास त्याने शेजाऱ्यांना बोलावत आपल्या पत्नीची कुणीतरी हत्या केल्याचे सांगितले. आपल्याला काहीच माहिती नसल्याचा बनाव देखील रचला. या घटनेबाबत पोलिसांना माहिती मिळताच पोलिसांनी घटनास्थळी धाव घेत तपासाला सुरुवात केली. 

आरोपी केंद्र सरकारच्या सेवेत

मात्र रोनीतराज सांगत असलेल्या गोष्टीवर संशय आल्यानं पोलिसांनी त्यालाच ताब्यात घेत चौकशी सुरू केली. या हत्येप्रकरणी पोलिसांनी हत्येचा गुन्हा दाखल केला असून मृत नीतू कुमारी हिचा पती रोनीतराज यालाच संशयित म्हणून ताब्यात घेतल्याची माहिती सहाय्यक पोलीस आयुक्त मोतीचंद राठोड यांनी दिली आहे. मात्र केंद्र सरकारच्या सेवेत असलेल्या व्यक्तीनं केलेल्या या गुन्ह्यामुळे शहरात मोठी खळबळ माजली आहे. मात्र या घटनेने परिसर हादरला असून अशा पद्धतीने पत्नीचा जीव घेणाऱ्या पतीला कठोर शासन करावे अशी चर्चा नागरिकांमध्ये होत आहे.

हे ही वाचा :