Share Market Opening Bell : शेअर बाजारात (Stock Market) आज (13 मार्च) सेन्सेक्स (Sensex) आणि निफ्टीच्या (Nifty) उसळीसह चांगली सुरुवात झाली आहे. आज सुरुवातीच्या सत्रात सेन्सेक्सने 300 अंकांनी उसळी घेतली तर, निफ्टीही तेजीत 17500 वर व्यवहार करताना पाहायला मिळाला. आठवड्याच्या पहिल्या व्यवहाराच्या दिवशी देशांतर्गत शेअर बाजाराची सुरुवात चांगली झाली. आज शेअर बाजार सुरु होताच सेन्सेक्स 145.06 अंकांनी म्हणजेच 0.25 टक्क्यांनी वाढून 59,280.19 वर उघडला आणि निफ्टी 42.80 अंकांनी म्हणजे 0.25 टक्क्यांनी वाढून 17,455.70 वर होता.
अमेरिकेच्या सिलिकॉन व्हॅली बँकेच्या संकटामुळे अमेरिकन शेअर बाजारातील घसरणीचा फटका भारतीय शेअर बाजारावर होईल असा अंदाज व्यक्त केला जात आहे. मात्र, अमेरिकन बाजारातील घसरणीचा सध्या भारतीय शेअर बाजारावर फारसा परिणाम झालेला दिसत नाही. जागतिक बाजारातील चढउताराचा परिणाम भारतीय शेअर बाजारावर दिसून येत आहे.
शुक्रवारी घसरला होता शेअर बाजार
याआधी शुक्रवारी (10 मार्च) भारतीय शेअर बाजारात घसरण झाली होती. सेन्सेक्स 671 अंकांनी घसरुन 59,135 वर बंद झाला तर, निफ्टीही 176 अंकांच्या घसरणीसह 17,412 वर बंद झाला.
कोणते शेअर्स तेजीत?
सुरुवातीच्या सत्रात तेजीत व्यवहार करणाऱ्या शेअर्समध्ये टेक महिंद्रा (Tech Mahindra), अदानी एंटरप्रायझेज (Adani Enterprises), अदानी पोर्ट (Adani Ports), हिंदाल्को इंडस्ट्रीज (Hindalco Industries) आणि अपोलो हॉस्पिटल (Apollo Hospitals) हे शेअर्स आहेत.
कोणते शेअर्स घसरले?
इंडसइंड बँक (IndusInd Bank), नेस्ले इंडिया (Nestle India), टायटन (Titan), एसबीआय लाईफ इन्शॉरन्स (SBI Life Insurance) आणि हिंदुस्तान युनिलिव्हर (HUL) या शेअर्समध्ये घसरण झाली आहे.
प्री-ओपनमधील बाजाराची परिस्थिती
आज प्री-ओपनमध्ये निफ्टी आणि सेन्सेक्समध्ये घसरणीसह व्यवहार करत होते. BSE चा सेन्सेक्स 190.61 अंकांच्या म्हणजेच 0.32 टक्क्यांच्या घसरणीसह 58944.52 वर होता. NSE चा निफ्टी 19.85 अंकांनी म्हणजेच 0.11 टक्क्यांनी घसरुन 17393.05 वर व्यवहार करत होता.
महत्त्वाच्या इतर बातम्या :