Manoj Jarange Convoy Vehicles Accident : जरांगेंच्या ताफ्यातील 2 कोटींची आलिशान डिफेंडर गाडी कोणाची?

Manoj Jarange Convoy Defender Car : मनोज जरांगे पाटील यांच्या पश्चिम महाराष्ट्र दौऱ्यात वापरली जाणारी आलिशान डिफेंडर कार सध्या चर्चेचा विषय ठरली आहे. ही कार नेमकी कोणाची, जरांगेंना ती कोणी दिली, याबाबत चर्चा सुरू असताना स्वतः मनोज जरांगे यांनी यावर स्पष्टीकरण दिलं आहे. ही डिफेंडर कार आपली स्वतःची नसून, एका कार्यकर्त्याने दौऱ्यासाठी उपलब्ध करून दिल्याचं जरांगे यांनी सांगितलं. संबंधित कार्यकर्त्याचं नाव आपल्याला माहिती नसल्याचंही त्यांनी स्पष्ट केलं. “माझ्याकडे एक रुपया नाही,” असं म्हणत त्यांनी कारबाबत सुरू असलेल्या चर्चांवर प्रतिक्रिया दिली. कार्यकर्त्याने “देवाने मला भरपूर दिलं आहे, तुम्ही माझ्या गाडीत बसा,” असं सांगितल्याचं जरांगे यांनी म्हटलं. मराठा समाजातील कार्यकर्ते आणि समर्थक आपल्या गाड्या उपलब्ध करून देतात आणि आपण त्यांच्या आग्रहाखातर त्यात प्रवास करतो, असंही त्यांनी स्पष्ट केलं. या कारच्या काचा फुटल्या असून, समर्थकांची मोठी गर्दी गाडीभोवती होत असल्याचं जरांगे यांनी सांगितलं.