Nashik Dargah Issue | नाशिकमधील अनधिकृत धार्मिकस्थळावर कारवाई; अफवांवर विश्वास न ठेवण्याचं आवाहन

Nashik News : नाशिक - पुणे रोडवरील काठे गल्ली  (Kate Galli) परिसरातील एका धार्मिक स्थळाचा वाद पेटण्याची शक्यता आहे. 25 वर्ष पाठपुरावा करून ही महापालिका (Nashik NMC) अनधिकृत धार्मिक स्थळ हटवित नसल्याने हिंदुत्ववादी संघटनानी आंदोलनाचा इशारा दिला होता. यानंतर आता काठे गल्ली परिसरातील अनधिकृत धार्मिक स्थळ हटविण्याच्या कारवाईला महापालिका प्रशासनाकडून सुरुवात झाली आहे. 

याबाबत अधिक माहिती अशी की, नाशिक - पुणे रोडवरील काठे गल्ली परिसरातील एक धार्मिक स्थळ 25 वर्ष पाठपुरावा करून ही महापालिका हटवित नसल्याने हिंदुत्ववादी संघटनांनी आंदोलनाचा इशारा दिला होता. काठे गल्ली परिसरात अनधिकृत धार्मिक स्थळ उभारण्यात आल्याचा हिंदुत्ववादी संघटनांनी आरोप करण्यात आला होता. आंदोलनाच्या पार्श्वभूमीवर काठे गल्ली परिसरात तगडा पोलीस (Nashik Police) बंदोबस्त तैनात करण्यात आला आहे. 

जमावबंदी लागू 

या परिसरात कायदा व सुव्यवस्थेचा प्रश्न जटिल होऊ नये म्हणून शहर पोलिसांनी मुंबई नाका व भद्रकाली पोलिसांच्या हद्दीतील काठे गल्लीसह द्वारका भागात शनिवारी जमावबंदी लागू केल्याचे आदेश पोलीस उपायुक्त किरणकुमार चव्हाण यांनी जारी केले आहेत. विशेष म्हणजे, शनिवारी पुणे रोडवरील द्वारका ते काठे गल्ली व आसपासचे अनेक रस्ते कायदा व सुव्यवस्था आणि वाहतुकीच्या कारणास्तव बंद करण्यात आले असून, वाहने पर्यायी मार्गाने नेण्याचे आवाहन करण्यात आले आहेत.