Saamana on BJP : मुंबईला ओरबाडण्यासाठी महाराष्ट्रद्वेष्टे एक झाले, सामनातून हल्लाबोल

Saamana on BJP : मुंबईला ओरबाडण्यासाठी महाराष्ट्रद्वेष्टे एक झाले, सामनातून हल्लाबोल

मुंबई महापालिका, मुंबई शहर एका बाजूला सध्याचे दिल्लीश्वर लुटत आहेत, तर दुसऱ्या बाजूला भाजप व त्यांची मिंधे पिलावळही लुटमार करीत आहे. तपास यंत्रणा या घोटाळय़ांकडे डोळेझाक करीत आहेत. अशावेळी मुंबई महापालिकेच्या रक्षणासाठी शनिवार, १ जुलै रोजी जनता रस्त्यावर उतरत आहे . मुंबई महापालिकेची लुटमार होत असताना जो मुर्दाडासारखा बसेल तो मुंबईकर कसला? १०५ हुतात्म्यांच्या बलिदानातून मुंबई महाराष्ट्राला मिळाली. त्या मुंबईस ओरबाडण्यासाठी सगळे महाराष्ट्रद्वेष्टे एक झाले आहेत. मुंबई हे महाराष्ट्राच्या भाळावरील ठसठशीत कुंकू आहे, मुंबई हेच महाराष्ट्राचे सौभाग्य ! ते सौभाग्य अखंड राखण्यासाठी उद्याचा विराट मोर्चा धडकणार आहे. मुंबईकरांची ही ताकद पाहून दिल्लीलाही हादरे बसू द्या!