Mumbai Local CSMT Protest : CSMT वर रेल्वे कर्मचाऱ्यांचे आंदोलन, मध्य रेल्वेची वाहतूक विस्कळीत

मुंबईतील छत्रपती शिवाजी महाराज टर्मिनस (CSMT) येथे रेल्वे कर्मचाऱ्यांनी केलेल्या आंदोलनामुळे मध्य आणि हार्बर मार्गावरील रेल्वे वाहतुकीवर मोठा परिणाम झाला. मुंब्रा येथे झालेल्या एका रेल्वे अपघातानंतर लोहमार्ग पोलिसांनी (GRP) दोन अभियंत्यांवर गुन्हा दाखल केल्याच्या निषेधार्थ रेल्वे कर्मचारी संघटनेने हे आंदोलन पुकारले होते. ‘मुंब्रा रेल्वे अपघात प्रकरणी दोन अभियंत्यांवर दाखल केलेला गुन्हा मागे घ्यावा,’ अशी मागणी करत सेंट्रल रेल्वे मजदूर संघाने (CRMS) आंदोलनाचा इशारा दिला होता. संध्याकाळच्या गर्दीच्या वेळी हे आंदोलन झाल्याने CSMT स्थानकात प्रवाशांची प्रचंड गर्दी झाली आणि अनेकांना मनस्ताप सहन करावा लागला. या आंदोलनामुळे लोकल गाड्या सुमारे ४० ते ४५ मिनिटे उशिराने धावत होत्या, ज्यामुळे मुंबईकरांचा मोठा खोळंबा झाला. रेल्वे प्रशासनाने हळूहळू लोकल सेवा पूर्ववत केली, मात्र तोपर्यंत मध्य आणि हार्बर या दोन्ही मार्गांवरील वाहतुकीचे वेळापत्रक कोलमडले होते.