वीजबिलात सूट देण्यास ऊर्जा मंत्रालय तयार, मुख्यमंत्र्यांकडे प्रस्ताव दिल्याचा ऊर्जा मंत्री नितीन राऊतांचा दावा

मुंबई : लॉकडाऊन काळात सर्वसामान्यांपासून ते सेलिब्रिटींपर्यंत अनेकांना वीजबिलाचा शॉक बसला. वाढीव आलेल्या वीजबिलाच्या अनेक तक्रारी समोर आल्या होत्या. ही बाब लक्षात घेत राज्य सरकार वीज ग्राहकांना दिलासा देण्याच्या तयारीत आहे. वीज बिलात ग्राहकांना सूट मिळणार असून राज्य सरकारचा त्याबाबतचा प्रस्ताव मुख्यमंत्र्यांकडे पाठवला आहे. त्यामुळे लोकांना वीजबिलात दिलासा देण्याबाबत मुख्यमंत्री निर्णय घेतील असे सांगत ऊर्जा मंत्री नितीन राऊत यांनी चेंडू उद्धव ठाकरे यांच्या कोर्टात ढकलला आहे.