Sunil Tatkare On Congress : काँग्रेसने वैचारिक दिवाळखोरी दाखवली; सुनील तटकरेंचा घणाघाती हल्ला

Sunil Tatkare and Dhananjay Munde: बीड जिल्ह्यातील पालकमंत्र्यांच्या दौऱ्यावेळी सुनेत्रा पवार यांच्या पत्रकार परिषदेत हस्तक्षेप करुन त्याठिकाणी स्वत: पुढाकार घेऊन बोलण्याचा प्रमाद केल्याचा आरोप असलेले राष्ट्रवादी काँग्रेसचे (NCP) आमदार धनंजय मुंडे (Dhananjay Munde) यांचे प्रदेशाध्यक्ष सुनील तटकरे यांनी कान टोचले आहेत. पालकमंत्र्यांच्या बैठकीत संबंधित जिल्ह्यातील आमदाराने बाजूला बसणे ठीक असते. पण त्या आमदाराने त्या पत्रकार परिषदेत स्वत:हून भाग घेणे योग्य नाही, असे मला वाटत असल्याचे सुनील तटकरे यांनी म्हटले. त्यांनी मुंबईत आयोजित करण्यात आलेल्या पत्रकार परिषदेत याबाबत भाष्य केले. या माध्यमातून सुनील तटकरे (Sunil Tatkare) यांनी धनंजय मुंडे यांना एकप्रकारे संदेश दिल्याची चर्चा राजकीय वर्तुळात रंगली आहे. (Maharashtra Politics news)

बीडमधील पत्रकार परिषदेबाबत माझं धनंजय मुंडे यांच्याशी बोलणं झालेलं नाही. त्यामुळे तिथे काय घडले, याची मला नेमकी माहिती नाही. पण पालकमंत्र्यांच्या बैठकीत आमदार बाजूला बसणे सामान्य बाब आहे. पण ती पत्रकार  परिषद ही प्रमुख मंत्र्याची असते. मध्यंतरी चंद्रशेखर बावनकुळे माझ्या जिल्ह्यात आले होते, तेव्हा जी पत्रकार परिषद झाली तेव्हा मी बाजूला बसून होतो, पण त्याठिकाणी बोललो नाही. आता धनंजय मुंडे हे त्या पत्रकार परिषदेत कोणत्या संदर्भात बोललो, याची माहिती मी घेईन. पण कोणतीही पत्रकार परिषद ही त्या महनीय व्यक्तीची असते. ती व्यक्ती मुख्य असते. अशावेळी बाजूला बसणे ठीक असते, पण बाजूला बसून पत्रकार परिषदेत भाग घेणे योग्य नाही, असे मला वाटते, असे सुनील तटकरे यांनी म्हटले.