Pune Politics: 'Chandrakant Patil माझ्यावर मोक्का लावणार', Ravindra Dhangekar यांचा गंभीर आरोप

पुण्यातील गुंड निलेश घायवळ प्रकरणामुळे महायुतीतील अंतर्गत राजकारण तापले असून, शिवसेना नेते रवींद्र धंगेकर आणि भाजपचे मंत्री चंद्रकांत पाटील यांच्यातील वाद विकोपाला गेला आहे. ‘चंद्रकांत पाटील यांच्या मार्फत समीर पाटील माझ्यावर मोक्का लावण्यासाठी पोलिसांसोबत तयारी करत आहे’, असा खळबळजनक आरोप रवींद्र धंगेकर यांनी केला आहे. उपमुख्यमंत्री एकनाथ शिंदे यांनी शांत राहण्याचा सल्ला देऊनही धंगेकर आपल्या भूमिकेवर ठाम आहेत. पाटील यांच्या आजूबाजूला गुन्हेगार वावरत असून पुणे शहरातील गुन्हेगारीला तेच जबाबदार असल्याचा दावाही धंगेकर यांनी केला. 'मी सत्य बोलतो, माझा आवाज कुणीही बंद करू शकत नाही', असे म्हणत धंगेकर यांनी आपले आरोप सुरूच ठेवले आहेत. या गंभीर आरोपांमुळे महायुतीमधील तणाव आणखी वाढला असून, आता भाजप यावर काय प्रतिक्रिया देणार याकडे सर्वांचे लक्ष लागले आहे.