Sangli Politics: 'आम्ही लहान मुलं, आम्हाला सांभाळा', सांगलीत तीन दिग्गज नेत्यांमध्ये जुगलबंदी

सांगली जिल्ह्याच्या राजकारणात पालकमंत्री चंद्रकांत पाटील, खासदार विशाल पाटील आणि आमदार विश्वजित कदम यांच्यात औदुंबर येथील एका कार्यक्रमात राजकीय जुगलबंदी बघायला मिळाली. ‘तुम्ही चार-पाच महिने पालकमंत्रीपदाचा राजीनामा द्यावा,’ असे थेट विधान करत आमदार विश्वजित कदम यांनी चंद्रकांत पाटील यांना आगामी जिल्हा परिषद निवडणुकांच्या पार्श्वभूमीवर आव्हान दिले. यांत्रिक बोटीच्या लोकार्पण सोहळ्यावेळी व्यासपीठावर तीनही नेते उपस्थित होते. यावेळी बोलताना, 'आम्ही लहान मुलांसारखे आहोत, तुम्ही ज्येष्ठ आहात, तुम्हीच आम्हाला सांभाळा,' अशा शब्दांत विशाल पाटील आणि विश्वजित कदम यांनी चंद्रकांत पाटील यांना कोपरखळी मारली. यावर चंद्रकांत पाटील यांनीही तितक्याच विनोदी शैलीत उत्तर दिले, ज्यामुळे उपस्थितांमध्ये हशा पिकला. जिल्हा परिषद निवडणुका तोंडावर आल्याने या राजकीय टोलेबाजीला विशेष महत्त्व प्राप्त झाले आहे.