पोलिसांवरचा दबाव खपवून घेतला जाणार नाही, विरोधीपक्ष नेत्यांकडून दबाव टाकण्याचा प्रयत्न : गृहमंत्री

पुणे : दिलीप वळसे पाटील कसल्या केसेस दाखल करता, कुणी घाबरत नाही, तुम्ही कमिशनसाठी अडून बसला आहात. गुन्हा दाखल करा आम्ही घाबरत नाही, अनिल देशमुख अशाच धमक्या देऊन गेलेत, अशा शब्दात भाजप प्रदेशाध्यक्ष आमदार चंद्रकांत पाटील यांनी टीका केली आहे. विरोधी पक्षनेते देवेंद्र फडणवीसांनी पोलिसांवर दबाव आणण्याचा प्रयत्न केला, सरकारी कामात हस्तक्षेप केला, असं गृहमंत्री दिलीप वळसे पाटलांनी म्हटलं आहे. येत्या दिवसांमध्ये गुन्हा दाखल करण्यासाठी निर्णय घेतला जाऊ शकतो, असं वळसे पाटील म्हणाले आहेत. त्यावर चंद्रकांत पाटलांनी प्रतिक्रिया दिली. चंद्रकांत पाटील कोविड केअर सेंटरच्या पाहणीसाठी आले होते. कोविड केअर सेंटर बाया कर्वेच्या हॉस्टेलमध्ये राष्ट्रीय स्वयंसेवक संघांनी उभारले आहे.