Web Exclusive : रोहित पवारांची भगव्याशी अशीही जवळीक; NCP MLA Rohit Pawar 'माझा'वर

नवी दिल्ली : राष्ट्रवादीचे आमदार रोहित पवार त्यांच्या मतदारसंघांमध्ये देशातला सर्वात उंच भगवा ध्वज उभारणार आहेत. खरंतर भगव्या रंगापाठीमागे त्यागाची आणि शौर्याची एक वेगळी परंपरा आहे पण राजकारणामध्ये हा भगवा अनेकदा शिवसेना भाजप यांच्या हिंदुत्वाचं प्रतीक म्हणून वापरला जातो. राज्याच्या राजकारणात त्या अर्थाने राष्ट्रवादीची भगव्याशी जवळीक वाढलेली असताना आता ज्युनियर पवार हे देखील भगव्यासाठी एक अनोखा उपक्रम राबवताना दिसत आहेत.

या ध्वजाला स्वराज्य-ध्वज असे नाव देण्यात आले असून यंदा दसऱ्याच्या शुभमुहूर्तावर 15 ऑक्टोबरला कर्जतमधल्या खर्ड्याच्या भुईकोट किल्ल्यात हा ध्वज उभारण्यात येणार आहे. प्रतिष्ठापनेआधी या ध्वजाची देशातल्या 6 राज्यांमधून जवळपास 12 हजार किलोमीटर प्रवास करत वेगवेगळ्या ठिकाणांहून पूजन यात्रा होणार आहे. अयोध्या, मथुरा, बोधगया केदारनाथ, आग्रा किल्ला, अजमेर शरीफ अशा वेगवेगळ्या 74 ऊर्जा स्थानांवर नेऊन या ध्वजाचे पूजन होणार आहे. सलग 37 दिवस या ध्वजाचा प्रवास होणार आहे.