Jitendra Awhad Vidhan Bhavan Rada : मध्यरात्री विधान भवनबाहेर राडा, आव्हाड आक्रमक

मध्यरात्री विधान भवनाबाहेर आंदोलन झाले. महाराष्ट्राचे राजकारण आता मुद्द्यावरून गुद्द्यावर आले आहे. गोपीचंद पडळकर आणि जितेंद्र आव्हाड यांच्या कार्यकर्त्यांमध्ये विधान भवन परिसरात हाणामारी झाली. त्यानंतर त्याचे पडसाद मध्यरात्री दीड वाजेपर्यंत उमटले. जितेंद्र आव्हाडांचे कार्यकर्ते नितीन देशमुख यांना पोलीस ताब्यात घेऊन पोलीस स्टेशनला जात होते. त्यामुळे आव्हाड संतापले आणि त्यांनी मध्यरात्रीच विधान भवनाच्या गेटवर आंदोलन केले. सरकार विरोधात आणि पोलिसांविरोधात घोषणाबाजी केली. यावेळी आव्हाडांच्या कार्यकर्त्यांची पोलिसांनी धरपकड केली. आव्हाडांनी पोलिसांची जीप अडवण्यासाठी थेट जीपसमोर आडवे पडून आंदोलन सुरू केले. अखेर पोलिसांनी आव्हाडांना मागे खेचून काढले. आंदोलनावेळी रोहित पवार देखील उपस्थित होते. मारहाण आणि देशमुखांना ताब्यात घेण्याचा त्यांनी निषेध केला. "मोकोक्याचा आरोपी लपवला जातोय," असा आरोप यावेळी करण्यात आला. गुन्ह्याचा आरोपी लपवला जात असल्याचा दावा करण्यात आला. नितीन देशमुख सध्या पोलिसांच्या ताब्यात आहेत. मरीन ड्राइव्ह पोलीस ठाण्यात पुढील कारवाई अपेक्षित आहे.