Maharashtra Legislative Council LoP | काँग्रेसचा दावा, सतेज पाटील यांच्या नावाची चर्चा!

मातोश्रीवर शिवसेना पक्षप्रमुख उद्धव ठाकरे यांच्यासोबत काँग्रेस नेत्यांची बैठक झाली. या बैठकीत विधानपरिषद विरोधी पक्षनेतेपदावर काँग्रेसने दावा केला आहे. सतेज पाटील यांच्या नावाची विधानपरिषद विरोधी पक्षनेते पदासाठी चर्चा सुरू आहे. अंबादास दानवे यांचा विरोधी पक्षनेतेपदाचा कार्यकाळ एकोणतीस ऑगस्टला पूर्ण झाला. त्यानंतर काँग्रेसने या पदासाठी आग्रह धरला आहे. सध्या विधानपरिषदेमध्ये विरोधी पक्षातील आमदारांची संख्या बघितल्यास काँग्रेसचे आठ (सात अधिक एक अपक्ष) आणि ठाकरेंच्या शिवसेनेचे सहा आमदार आहेत. त्यामुळे महाविकास आघाडीमध्ये विधानपरिषद विरोधी पक्षनेते पदासाठी काँग्रेसने दावा केला असल्याची सूत्रांची माहिती आहे. काँग्रेसचे नेते विजय वडेट्टीवार, बाळासाहेब थोरात आणि अमीन पटेल यांनी उद्धव ठाकरे यांची भेट घेतली. सतेज पाटील यांच्या नावाला महाविकास आघाडीचा पाठिंबा मिळावा यासाठी ही भेट होती. सूत्रांच्या माहितीनुसार, विधानपरिषदेतील आमदारांच्या संख्याबळानुसार काँग्रेसकडे विरोधी पक्षनेतेपद जाण्याची शक्यता आहे. तर विधानसभा विरोधी पक्षनेते पदाबाबत विधानसभा अध्यक्षांनी अद्याप निर्णय घेतलेला नाही, मात्र तिथे ठाकरेंच्या शिवसेनेच्या आमदारांची संख्या जास्त असल्याने ते पद त्यांच्याकडे जाण्याची शक्यता आहे.