Sikandar Shaikh Arrest: 'माझ्या लेकाला फसवलंय', सिकंदर शेखच्या वडिलांचा आक्रोश Special Report

आंतरराष्ट्रीय कुस्तीपटू आणि 'महाराष्ट्र केसरी' किताबाचा मानकरी सिकंदर शेखला (Sikandar Shaikh) पंजाब पोलिसांनी (Punjab Police) अवैध शस्त्र तस्करी प्रकरणी अटक केली आहे. त्याच्यावर राजस्थानमधील कुख्यात पपला गुर्जर (Papla Gurjar) टोळीशी संबंध असल्याचा आरोप आहे. 'त्याला कोणीतरी फसवले आहे, तो असे करणार नाही,' असा दावा करत सिकंदरच्या वडिलांनी हे आरोप फेटाळून लावले आहेत. पंजाब पोलिसांनी सिकंदरसह चार जणांना अटक केली असून, त्यांच्याकडून पाच पिस्तुले, जिवंत काडतुसे, सुमारे १.९९ लाख रुपये रोख आणि दोन लक्झरी गाड्या जप्त केल्या आहेत. आरोपी उत्तर प्रदेशातून शस्त्रे आणून पंजाब आणि आसपासच्या परिसरात पुरवत असल्याच्या माहितीनंतर पोलिसांनी ही कारवाई केली. या घटनेमुळे कुस्ती विश्वाला मोठा धक्का बसला असून, महाराष्ट्राच्या लाल मातीची बदनामी झाल्याची भावना व्यक्त होत आहे. भाजप नेते प्रवीण दरेकर यांनी यावर प्रतिक्रिया देताना म्हटले आहे की, कायद्यासमोर सर्व समान आहेत आणि जर कोणी त्याला गोवण्याचा प्रयत्न करत असेल, तर ते अयोग्य आहे.