Student Safety: बदलापूर प्रकरणानंतरही २०,००० शाळांकडून विद्यार्थी सुरक्षेकडे दुर्लक्ष?

बदलापूर येथील लैंगिक अत्याचार प्रकरणानंतर (Badlapur sexual assault case) विद्यार्थ्यांच्या सुरक्षेप्रकरणी दाखल झालेल्या सुमोठो याचिकेवर (Suo motu petition) राज्य सरकारने उच्च न्यायालयात (High Court) अनुपालन अहवाल सादर केला आहे. 'राज्यातील एक लाख आठ हजार शाळांपैकी अठ्ठ्याऐंशी हजार शाळांनी विद्यार्थ्यांच्या सुरक्षेसंदर्भातील अनुपालन अहवाल सादर केला आहे', अशी माहिती राज्य सरकारतर्फे उच्च न्यायालयात देण्यात आली. या आकडेवारीनुसार, सुमारे २०,००० शाळांनी अद्यापही हा अहवाल सादर केलेला नाही, ज्यामुळे विद्यार्थ्यांच्या सुरक्षेचा प्रश्न पुन्हा एकदा ऐरणीवर आला आहे. ऑगस्ट २०२४ मध्ये बदलापूर येथील एका शाळेत दोन लहान मुलींवर झालेल्या लैंगिक अत्याचाराच्या घटनेनंतर मुंबई उच्च न्यायालयाने स्वतःहून या प्रकरणाची दखल घेत जनहित याचिका दाखल करून घेतली होती. यानंतर, न्यायालयाने शालेय मुलांच्या सुरक्षेसाठी नियम आणि उपाययोजना करण्याकरिता एक समिती स्थापन करण्याचे आदेश दिले होते, ज्यानुसार सरकारने एक विस्तृत नियमावली जारी केली होती.