Ghatkoper Hoarding Collapse: घाटकोपर होर्डिंग दुर्घटनेचा तपास गुन्हे शाखेकडे वर्ग, भावेश भिंडेला अटक
Download ABP Live App and Watch All Latest Videos
View In Appमुंबई : वादळी वाऱ्यानंतर घडलेल्या घाटकोपर (Ghatkopar) बॅनर दुर्घटनेत 17 जणांचा मृत्यू झाला. बेकायदेशीरपणे बॅनर उभारुन 17 जीवांच्या मृत्यूस कारणीभूत ठरलेल्या आरोपी भावेश भिंडेला अखेर मुंबई पोलिसांनी (Police)अटक केली आहे. राजस्थानच्या जयपूरमधून भावेशच्या मुसक्या आवळण्यात पोलिसांना यश आलं आहे. घाटकोपर दुर्घटनेवरुन राजकारण तापलं असता, पोलीस प्रशासन गंभीर होताच, याप्रकरणातील आरोपी भावेश भिंडे बेपत्ता झाला होता. भावेश भिंडेच्या मागावर मुंबई पोलिसांची 7 पथकं कार्यरत होती, वेगवेगळ्या भागात भिंडेचा पोलिसांकडून शोध सुरु होता, तो राज्याबाहेर पळाल्याचा संशय पोलिसांना होता. त्यानुसार, पोलिसांनी शोधमोहिम राबवली होती. यापूर्वी भिंडेचे शेवटचे लोकेशन लोणावळ्यात आढळलं होतं. मात्र, आज पोलिसांनी भिंडेला राजस्थानमधून अटक केली आहे.
राजधानी मुंबईतील घाटकोपर दुर्घटनेप्रकरणी पंतनगर पोलीस ठाण्यात गुन्हा दाखल करण्यात आला आहे. आरोपी भावेश भिंडे आणि जाहिरात कंपनीविरोधात सदोष मनुष्यवधाचा गुन्हा दाखल करण्यात आला आहे. अटकेच्या भीतीने भिंडेने पळ काढला होता, पण अखेर मुंबई पोलिसांचे पथक भिंडेच्या मुसक्या आवळण्यात यशस्वी ठरले आहे. पोलीस पथक मागावर असल्याचे समजताच, पोलिसांचे पथक लोणावळ्यात पोहचण्यापूर्वीच भावशने आपला मोबाईल बंद केला, त्यानंतर त्याचा कोणताही थांगपत्ता लागलेला नाही. मात्र, पोलिसांनी त्याला जयपूरमधून अटक केली आहे