Eknath Khadse On Raksha Khadse : सुनेची केंद्रात वर्णी; सासरे एकनाथ खडसे यांची पहिली प्रतिक्रिया

PM Modi Oath Taking Ceremony : नरेंद्र मोदींच्या (Narendra Modi) तिसऱ्या शपथविधीपूर्वी राज्यातील बड्या नेत्यांना दिल्लीतून फोनाफोनी सुरु आहे. उत्तर महाराष्ट्रातून रावेरच्या खासदार रक्षा खडसे (Raksha Khadse) यांची लॉटरी लागली आहे. रक्षा खडसे यांना केंद्रीय मंत्रिमंडळात संधी मिळणार आहे. या पार्श्वभूमीवर एबीपी माझाशी बोलताना रक्षा खडसे भावूक झाल्याचे दिसून आले.  माझ्या प्रवासात नाथाभाऊंचा मोठा वाटा असल्याचे त्यांनी म्हटले आहे. 

रक्षा खडसे म्हणाल्या की, माझी राजकारणाची सुरुवातच एकनाथ खडसे यांच्यापासून झाली आहे. माझ्या राजकीय प्रवासात नाथाभाऊंचा मोठा वाटा आहे. माझ्या माहेरच्या लोकांचा राजकारणाशी कुठलाही संबंध नाही. सामाजिक कामाची आवड मला माझ्या वडिलांपासून मिळालेली आहे. 

केंद्रीय मंत्रिमंडळात लॉटरी लागल्यानंतर रक्षा खडसे भावूक 

एका राजकीय घराण्यात मी सून म्हणून आले. नाथाभाऊ यांच्याकडून मला खूप काही शिकायला मिळाले. माझ्या आयुष्यातील बरीच परिस्थिती बदलत गेली. त्या परिस्थितीत नाथाभाऊंनी मला खूप साथ दिली आहे. तसेच पक्षाच्या नेत्यांसह सर्व जनतेने मला साथ दिली आहे.  हा क्षण माझ्यासाठी अत्यंत मोठा आहे. इतकी मोठी संधी मला मिळत आहे, असे म्हणताना रक्षा खडसे भावूक झाल्याचे दिसून आले. मला कुठलीही अपेक्षा नाही. पक्ष जी जबाबदारी देईल ती जबाबदारी मी स्वीकारेल, असेही त्यांनी म्हटले आहे.