Diwali Market Rush: दिवाळी दोन दिवसांवर, बाजारपेठांमध्ये खरेदीसाठी झुंबड

दिवाळीनिमित्त मुंबई आणि पुणे येथील बाजारपेठांमध्ये खरेदीसाठी नागरिकांची झुंबड उडाल्याचे चित्र आहे. मुंबईच्या दादर मार्केटमधून प्रतिनिधी इशान आणि पुण्याच्या मंडई परिसरातून प्रतिनिधी शिवानी यांनी तेथील उत्साहाचा आढावा घेतला. 'प्रत्येक पुणेकराची दिवाळी किंवा कोणताही सण तुळशीबागेत किंवा मंडईत आल्याशिवाय पूर्ण होत नाही,' असे शिवानी यांनी सांगितले. दादर मार्केटमध्ये आकाशकंदील, पणत्या, फराळाचे पदार्थ आणि कपडे खरेदीसाठी प्रचंड गर्दी असून लांबून लोक खरेदीसाठी येत आहेत. पुण्यातही मंडई आणि तुळशीबाग परिसरात सजावटीच्या वस्तू, पणत्या आणि पूजेचे साहित्य घेण्यासाठी पुणेकरांची लगबग सुरू आहे. काही वेळापूर्वी पाऊस पडून गेल्यानंतरही गर्दी कायम असल्याचे चित्र आहे. आगामी शनिवार-रविवार गर्दी आणखी वाढण्याची शक्यता वर्तवण्यात येत आहे.