कोल्हापूरच्या कळंबा कारागृहात कैद्याच्या नावे नातेवाईकांकडे पैशांची मागणी, पोलिसाच्या सॉक्समध्ये चिठ्ठ्या

कोल्हापूर जिल्ह्यातील कळंबा कारागृह गेल्या दोन ते तीन महिन्यांपासून वेगवेगळ्या कारणावरून चर्चेत राहिले आहे. कधी या कारागृहामध्ये मोबाईल, सिम कार्ड, चार्जर इतकंच काय पण गांजा देखील सापडल्याचे समोर आले आहे. आणि आता या कळंबा कारागृहातीलच पोलीस शिपायाने आपल्या बुटाच्या सॉक्समधून कैद्यांच्या नातेवाईकाकडे 25 हजार रुपयांची मागणी केल्याचे समोर आले आहे. किसन बिरलिंगे या पोलीस शिपायाची चौकशी करून त्याचा अहवाल वरिष्ठ अधिकार्‍यांकडे पाठवला आहे. मात्र चिठ्ठीमध्ये ज्या कैद्यांची नाव आहेत त्यांनी ही चिठ्ठी लिहिली नसल्याचे चौकशीदरम्यान समोर आले आहे. जर कैद्यांनी चिठ्ठी लिहिली नसेल तर ही चिठ्ठी कोणी लिहिली? आणि अजून किती कैद्यांच्या नातेवाईकांकडे अशा पद्धतीने पैशांची मागणी केली याचा तपास होणे गरजेचा आहे..