Delhi Blast: 'स्फोटात आठ जणांचा मृत्यू', Home Minister Amit Shah यांची माहिती; NIA, NSG कडून तपास सुरू

दिल्लीतील लाल किल्ल्याजवळ (Red Fort) झालेल्या कार स्फोटानंतर (Car Blast) गृहमंत्री अमित शहा (Amit Shah) यांनी घटनास्थळाची पाहणी केली असून, या स्फोटात आठ जणांचा मृत्यू झाल्याची माहिती दिली आहे. ‘आज सायंकाळी ७ वाजण्याच्या सुमारास, दिल्लीतील लाल किल्ल्याजवळील सुभाष मार्ग ट्रॅफिक सिग्नलवर एका Hyundai i20 कारमध्ये स्फोट झाला,’ असे अमित शहा म्हणाले. या स्फोटात अनेकजण जखमी झाले असून काही वाहनांचेही नुकसान झाले आहे. घटनेची माहिती मिळताच दिल्ली पोलिसांची पथके तातडीने दाखल झाली. अमित शहा यांनी जखमींची रुग्णालयात जाऊन भेट घेतली असून, या प्रकरणाची सर्व बाजूंनी सखोल चौकशी केली जाईल असे स्पष्ट केले आहे. या तपासासाठी NSG आणि NIA यांसारख्या वरिष्ठ यंत्रणांना पाचारण करण्यात आले असून, अमित शहा उद्या तपास यंत्रणांच्या वरिष्ठ अधिकाऱ्यांसोबत उच्चस्तरीय बैठक घेणार आहेत.