Cyclone Alert: 'समुद्रात जाऊ नये', प्रशासनाचा इशारा; Sindhudurg मध्ये पर्यटन, मासेमारी ठप्प!

अरबी समुद्रात निर्माण झालेल्या कमी दाबाच्या पट्ट्यामुळे आणि वादळसदृश परिस्थितीमुळे सिंधुदुर्ग जिल्ह्यासह कोकण किनारपट्टीवर जनजीवन विस्कळीत झाले आहे. प्रशासनाने खबरदारीचा इशारा दिला असून, 'समुद्रात मच्छिमारांनी आणि पर्यटकांनी जाऊ नये', असे स्पष्ट आवाहन केले आहे. या परिस्थितीमुळे जिल्ह्यातील मासेमारी पूर्णपणे बंद करण्यात आली असून, सुरक्षेसाठी गुजरातच्या बोटींनीही देवगड बंदरात आश्रय घेतला आहे. त्याचबरोबर, मालवण जेटी ते सिंधुदुर्ग किल्ला ही प्रवासी बोट वाहतूकही थांबवण्यात आली आहे, ज्यामुळे पर्यटनाला मोठा फटका बसला आहे. गेले दोन दिवस सुरू असलेल्या मुसळधार पावसामुळे भातशेतीचे मोठे नुकसान झाले आहे. कापणी करून ठेवलेले भात पीक पावसात सडत असल्याने संतप्त शेतकऱ्यांनी पिकांचे पंचनामे करून तातडीने नुकसान भरपाई देण्याची मागणी केली आहे.