Buldhana : बुलढाण्यात हरभरा विक्रीसाठी शेतकऱ्यांची गर्दी, वाहनांच्या दोन किमीपर्यंत रांगा

बुलढाणा जिल्ह्यात आज हरभरा खरेदी केंद्र सुरु झाल्याने शेतकऱ्यांनी हरभरा विक्रीसाठी मोठी गर्दी केली आहे. जवळपास दीड ते दोन किलोमीटरपर्यंत वाहनांच्या रांगा लागल्या असून खरेदी केंद्रावर नियोजन नसल्याने शेतकरी आक्रमक झाले आहेत. आता खरीप हंगाम सुरु झाला असून शेतकऱ्यांना पेरणीसाठी पैशांची आवश्यकता आहे. त्यामुळे शेतकरी बाजार समितीत हरभरा विक्रीसाठी गर्दी करत आहेत. गेल्या आठवड्यात हरभऱ्याचे भाव प्रति क्विंटल 5400 रु होते. पण केंद्र सरकारने डाळबिया आयात धोरणात शिथिलता दिल्याने आता हरभऱ्याचे भाव पडले आहे. खाजगी व्यापारी हरभऱ्याला प्रति क्विंटल 4400 ते 4500 रुपये देत असल्याने शेतकरी बाजार समितीत हरभरा विक्रीसाठी आणत आहेत. त्यामुळे एकच गर्दी झाल्याने शेतकरी आक्रमक झाले असून त्यांनी मोदी सरकारविरुद्ध घोषणाबाजी केली. तसंच डाळबिया आयात धोरणाचा निषेध देखील केला.