Dharashiv Banjara Protest : धाराशिवमध्ये सकल गोर समाजाचा मोर्चा, आरक्षणाची मागणी नेमकी काय?

सकल गोर बंजारा समाजाने अनुसूचित जमाती (ST) प्रवर्गातून आरक्षणाच्या मागणीसाठी भव्य महामोर्चा आयोजित केला आहे. हैदराबाद गॅझेटियरनुसार आरक्षणाची मागणी करण्यात येत आहे. राजमाता जिजाऊ चौकातून सुरू झालेला हा मोर्चा डॉ. बाबासाहेब आंबेडकर चौक आणि छत्रपती शिवाजी महाराज चौकातून जिल्हाधिकारी कार्यालयावर धडकणार आहे. "केंद्र आणि राज्य सरकारनं आतापर्यंत समाजाची फसवणूक केली आहे," असे समाजाच्या वतीने स्पष्ट करण्यात आले आहे. आपल्या हक्काच्या लढाईसाठी लाखोंच्या संख्येने या मोर्चामध्ये सहभागी होण्याचे आवाहन बंजारा समाजाच्या वतीने करण्यात आले आहे. या ऐतिहासिक मोर्चामध्ये मोठ्या संख्येने समाजबांधव, महिला आणि युवक पारंपरिक वेशभूषेत सहभागी झाले आहेत. आरक्षणाच्या मागणीसाठी समाजाने एकवटून सरकारवर दबाव आणण्याचा प्रयत्न केला आहे. हा मोर्चा समाजाच्या तीव्र भावना आणि मागण्या सरकारपर्यंत पोहोचवण्यासाठी महत्त्वाचा आहे.