Odisha Andhra Pradesh Gulab Cyclone : बंगालच्या उपसागरात आज गुलाब चक्रीवादळाचा इशारा

भुवनेश्वर : बंगालच्या उपसागरातील कमी दाबाच्या पट्ट्यामुळे निर्माण झालेले गुलाब चक्रीवादळ आज संध्याकाळी उत्तर आंध्र प्रदेश आणि ओडिशाच्या दक्षिण किनारपट्टीला धडकणार आहे. हे चक्रीवादळ 95 किमी तासी वेगाने किनारपट्टीकडे सरकत असल्याचा इशारा हवामान खात्याने दिला आहे. त्यामुळे या दोन राज्यातील किनारपट्टी क्षेत्रावर रेड अलर्ट जारी करण्यात आला आहे. 

 

बंगालच्या उपसागराच्या उत्तरेला शनिवारी दुपारी कमी दाबाचा पट्टा निर्माण झाला. त्याचे रुपांतर चक्रीवादळात झाले असून रविवारी संध्याकाळपर्यंत ते आंध्र प्रदेशच्या उत्तर किनारपट्टीला आणि ओडिशाच्या दक्षिण किनारपट्टीला धडकण्याची शक्यता आहे. या चक्रीवादळाचे 'गुलाब' नाव हे पाकिस्तानने सुचवलं आहे. विशाखापट्टनम आणि गोपालपूर या दरम्यान असलेल्या कलिंगपट्टनम या ठिकाणी संध्याकाळपर्यंत गुलाब चक्रीवादळ पोहोचण्याची शक्यता असल्याचं भारतीय हवामान खात्याने सांगितलं आहे.