Thane Cluster Row: 'आम्हाला क्लस्टर नको', कळवा क्लस्टरला तीव्र विरोध, नागरिकांनी लावले निषेधाचे बॅनर

ठाणे महापालिका (Thane Municipal Corporation) क्षेत्रातील कळवा (Kalwa) परिसरात क्लस्टर योजनेला स्थानिक रहिवाशांकडून तीव्र विरोध होत आहे. मनीषा नगर (Manisha Nagar) परिसरातील अनेक सोसायट्यांनी 'क्लस्टर नको' असे बॅनर लावून या योजनेचा जाहीर निषेध केला आहे. 'नागरिकांच्या मताधिकाराचा विचार न करता क्लस्टर प्रकल्प राबवण्याचा प्रयत्न केला जात आहे', असा स्थानिकांनी आरोप केला आहे. या परिसरात सुमारे ८८ सोसायट्या असून, आपला विरोध दर्शवण्यासाठी नागरिकांनी इमारतींवर बॅनर लावले आहेत. क्लस्टर योजनेमुळे पुनर्विकास लवकर होणार नाही आणि नागरिकांना वेळेवर हक्काचे घर मिळणार नाही, अशी भीती रहिवाशांना वाटत आहे. हा प्रकल्प मुख्यमंत्री एकनाथ शिंदे यांचा महत्त्वाकांक्षी प्रकल्प मानला जातो, मात्र त्याला आता थेट नागरिकांकडूनच विरोध होताना दिसत आहे. अनेक ठिकाणी सर्वेक्षणाला आणि योजनेला नागरिकांनी यापूर्वीही हरकत घेतली आहे.