Virat Kohli in T20 World Cup 2022 : क्रिकेट जगताचा अनभिषिक्त राजा किंग कोहली अर्थात विराट कोहली (Virat Kohli) यंदाच्या टी20 विश्वचषक 2022 (T20 World Cup 2022) स्पर्धेत कमाल कामगिरी करताना दिसून आला. भारतीय संघाने खेळलेल्या 6 सामन्यातील 4 सामन्यात कोहलीने अर्धशतकं झळकावली. आज सेमीफायनलमध्ये इंग्लंडकडून पराभूत होऊन भारताला स्पर्धेबाहेर जावं लागलं असलं तरी या सामन्यातही विराटने अर्धशतक झळकावलं. त्यामुळे 6 सामन्यात कोहलीने 4 अर्धशतकं झळकावत एकूण 296 रन केले. पण कोहलीच्या या तुफान खेळीनंतरही सेमीफायनलमध्ये गोलंदाजांनी भ्रनिरास केला आणि भारतीय संघाचं आव्हान संपुष्टात आलं.
कोहली आणि यंदाच्या वर्ल्ड कपचा विचार केला तर सर्वात पहिल्या भारत आणि पाकिस्तान सामन्यात अगदी चुरशीची लढत पाहायला मिळाली. भारताला विजयासाठी 160 धावा करायच्या होत्या, पण 31 धावांवर 4 विकेट गमावल्यानंतर कोहली आणि हार्दिक पंड्याने शानदार भागिदारी करत भारताचा विजय पक्का केला. विराटने 53 चेंडूत नाबाद 82 धावा केल्या होत्या. त्यानंतर नेदरलँडविरुद्धही विराटनं नाबाद 62 धावा केल्या. मग दक्षिण आफ्रिकेविरुद्ध तो स्वस्तात बाद झाला आणि भारतानं सामना गमावला होता. ज्यानंतर बांगलादेशविरुद्धच्या सामन्यातही विराटनं फलंदाजीची धुरा सांभाळत नाबाद 64 धावांची खेळी केली. मग झिम्बाब्वेविरुद्ध कोहली 26 धावा करुन बाद झाला. पण आजच्या इंग्लंडविरुद्धच्या 'करो या मरो'च्या सामन्यात कोहलीने 40 चेंडूत 50 धावांची खेळी करत संघाचा डाव सावरला. अखेर भारत पराभूत होऊन स्पर्धेबाहेर गेला असला तरी कोहलीनं दिलेली झुंज नक्कीच वाखणण्याजोगी होती.
फॅन्स कमालीचे नाराज
मागील काही वर्षे खराब फॉर्मात असलेल्या कोहलीने आशिया कप 2022 मध्ये फॉर्मात पुन्हा परतत शतक झळकावलं. पण त्यानंतर विश्वचषकात मात्र कोहलीने अगदीच धमाकेदार खेळ दाखवला. 6 सामन्यात त्याने 296 धावा कुटल्या, पण तरीही भारत विश्वचषक न जिंकू शकल्याने सोशल मीडियावर कोहली फॅन्स आणि भारतीय चाहते नाराज झाले असून अनेक इमोशनल मीम शेअर करत आहेत.
हे देखील वाचा-