विम्बल्डन : विम्बल्डनच्या पुरुष एकेरीत गतविजेता टेनिसपटू रॉजर फेडररचं आव्हान उपांत्यपूर्व फेरीत संपुष्टात आलं आहे. दक्षिण आफ्रिकेच्या केविन अँडरसननं फेडररला पाच सेट्समध्ये पराभूत केलं.
सव्वा चार तास चाललेल्या सामन्यात अँडरसनने फेडररवर 2-6, 6-7, 7-5, 6-4, 13-11 अशी मात केली. दोन सेट्समध्ये आघाडी मिळवल्यानंतर फेडरर विम्बल्डनमध्ये दुसऱ्यांदाच पराभूत झाला.
नवव्यांदा विम्बल्डनचं टायटल पटकावण्याचं रॉजर फेडररचं स्वप्न धुळीत मिळालं. फेडररला 2013 सालानंतर यंदा पहिल्यांदाच उपांत्य फेरीआधी गाशा गुंडाळावा लागला. 20 वेळा ग्रँडस्लॅम विजेत्या फेडररकडे सलग पाचव्यांदा उपांत्य फेरीत धडक मारण्याची संधी होती.
विम्बल्डनच्या उपांत्य फेरीत धडक मारण्याची अँडरसनची ही पहिलीच वेळ आहे. रविवारी होणाऱ्या अंतिम फेरीत धडक मारण्यासाठी अँडरसन शुक्रवारी मिलॉस राओनिक किंवा जॉन इसनरशी झुंज देईल.
'विम्बल्डनमध्ये फेडररचा केलेला पराभव माझ्या कायम स्मरणात राहील. हा इतका अटीतटीचा सामना होता, की काय सांगू.. आजचा दिवस माझा आहे, हे मी मनाला वारंवार समजावत होतो.' अशा भावना अँडरसनने व्यक्त केल्या.