R Ashwin on Sanju Samson: भारताचा माजी फिरकी गोलंदाज रविचंद्रन अश्विनने यष्टीरक्षक-फलंदाज संजू सॅमसनबद्दल एक महत्त्वपूर्ण विधान केले आहे. अश्विनच्या मते, भविष्यात संजू चेन्नई सुपर किंग्सचे (CSK) कर्णधारपद भूषवताना दिसू शकतो. मात्र, त्याने हेही स्पष्ट केले की, संजूने इतर कोणाचाही वारसा पुढे चालवण्याची गरज नाही, उलट त्याने स्वतःची ओळख निर्माण केली पाहिजे. अश्विनने ESPNcricinfo ला सांगितले, "ही प्रक्रिया खूप पूर्वी सुरू झाली. जेव्हा रवींद्र जडेजाला कर्णधारपद देण्यात आले, तेव्हा फ्रँचायझीमध्ये बदल होऊ लागले." मात्र, जडेजाचा कर्णधारपदाचा कार्यकाळ फारसा यशस्वी ठरला नाही आणि नंतर ही जबाबदारी पुन्हा महेंद्रसिंग धोनीकडे परत आली.
संजू भविष्यात कर्णधारपद नक्कीच भूषवेल
तेव्हापासून, गेल्या दोन-तीन वर्षांत ऋतुराज गायकवाड आणि प्रशिक्षक स्टीफन फ्लेमिंग यांनी संघाचे व्यवस्थापन करण्यात महत्त्वाची भूमिका बजावली आहे. आर. अश्विनच्या मते, आता हळूहळू खेळाडूंच्या पुढच्या पिढीला पुढे आणण्याची वेळ आली आहे. याचवेळी अश्विनने संजू सॅमसनच्या नावाचा उल्लेख केला. अश्विन म्हणाला की, तो ज्योतिषी नाही, पण त्याला वाटते की संजू भविष्यात कधीतरी चेन्नई सुपर किंग्सचे कर्णधारपद नक्कीच भूषवेल.
प्रत्येक खेळाडूची स्वतःची ओळख असते
मात्र, रविचंद्रन अश्विन असेही म्हणाला की, संजूने कोणत्याही मोठ्या खेळाडूची जागा घेण्याचा किंवा त्याचा वारसा पुढे चालवण्याचा प्रयत्न करू नये. तो स्पष्टपणे महेंद्रसिंग धोनीच्या वारशाचा उल्लेख करत होता. अश्विनच्या मते, "प्रत्येक खेळाडूची स्वतःची ओळख असते आणि संजूनेही आपल्या कर्णधारपदातून आणि खेळातून स्वतःची छाप सोडली पाहिजे."
तो म्हणाला की, अनेकदा खेळाडू दुसऱ्यांच्या पावलावर पाऊल ठेवण्याच्या प्रयत्नात आपली खरी ओळख गमावून बसतात, पण संजू सॅमसनने तसे करू नये. अश्विन म्हणतो, "संजूने स्वतःच्या शैलीत जगावे आणि खेळावे. त्याला इतर कोणासारखे असण्याची गरज नाही. जर त्याने कर्णधारपद भूषवले, तर तो स्वतःच्या विचारांनी आणि स्वतःच्या दृष्टिकोनाने संघाचे नेतृत्व करू शकतो."
दरम्यान, संजू सॅमसनने आयपीएल (इंडियन प्रीमियर लीग) 2026 मध्ये शानदार पुनरागमन केले आहे. हंगामाच्या सुरुवातीला त्याला संघर्ष करावा लागला, पण नंतर त्याने आपल्या दमदार फलंदाजीने सर्वांचे लक्ष वेधून घेतले. त्याने दिल्ली कॅपिटल्स (DC) विरुद्ध 115 धावांची नाबाद शानदार खेळी केली, ज्यामुळे CSK ला मोठा विजय मिळाला. त्यानंतर पुढच्या सामन्यात त्याने 32 चेंडूंमध्ये 48 धावा केल्या आणि तो चांगल्या फॉर्ममध्ये दिसत होता.
इतर महत्वाच्या बातम्या