धर्मवीर आता बॉलबॉय नसणार, बीसीसीआयचा निर्णय
एबीपी माझा वेब टीम | 24 Oct 2017 02:38 PM (IST)
पोलियोग्रस्त तरुणाला क्रिकेट सामन्यात बॉल उचलण्याचं काम करायला लावल्याबद्दल सोशल मीडियावर टीका झाली होती.
नवी दिल्ली : पोलियोग्रस्त धर्मवीर पाल टीम इंडियाचा मोठा चाहता आहे. कित्येक वर्ष तो सामन्यांमध्ये बाऊंड्रीवर बॉलबॉय म्हणून दिसतो. मात्र यापुढे तो बॉलबॉय म्हणून दिसणार नसल्याचं बीसीसीआयने जाहीर केलं. धर्मवीरला आता स्टेडियममध्ये बसून मॅच पाहता येणार आहे. पोलियोग्रस्त तरुणाला क्रिकेट सामन्यात बॉल उचलण्याचं काम करायला लावल्याबद्दल सोशल मीडियावर टीका झाली होती. त्यानंतर बीसीसीआयने परिपत्रक काढून यापुढे धर्मवीरला बॉलबॉयची भूमिका देणार नसल्याचं जाहीर केलं. 'क्रिकेट हे माझं आयुष्य आहे' असं धर्मवीर म्हणतो. अनेक क्रिकेटपटूंशी त्याची वैयक्तिक ओळख आहे. 2013 मध्ये सचिन तेंडुलकरच्या अखेरच्या सामन्यातही तो बॉलबॉय होता. अंगावर तिरंगा काढून घेणारा सचिनचा सुपरफॅन सुधीर गौतम आणि धर्मवीरची सचिनने भेट घेतली होती. 'तुमच्यासारख्या चाहत्यांमुळेच आम्ही क्रिकेट खेळू शकतो. भारतीय क्रिकेटला तुमच्यासारख्या फॅन्सची गरज आहे' असं मास्टरब्लास्टरने त्यांना सांगितलं होतं.