पुणे : महाराष्ट्र केसरी कुस्तीच्या आखाड्यात झालेल्या अंतिम सामन्यात नाशिकच्या हर्षवर्धन सदगीर याने लातूरच्या शैलेश शेळकेवर मात करत मानाची चांदीची गदा उंचावली आहे. हर्षवर्धनने शैलेश शेळके याचा 3-2 असा पराभव केला आहे. विशेष म्हणजे हर्षवर्धन आणि शैलेश दोघेही वस्ताद काका पवार यांचे शिष्य आहेत. दोघेही पुण्याच्या आंतरराष्ट्रीय क्रीडा संकुलात प्रशिक्षण घेत आहेत.
काल (06 जानेवारी) माती विभागाच्या फायनलमध्ये शैलेश शेळके याने चुरशीच्या लढतीत कोल्हापूरच्या माऊली जमदाडेचा पराभव केला होता. तर मॅट विभागात हर्षवर्धन सदगीरनं पुणे शहरच्या अभिजीत कटकेवर (मागील वर्षाचा उपविजेता आणि 2018 चा विजेता) सनसनाटी विजय नोंदवून किताबासाठीची फायनल गाठली होती.
महाराष्ट्र केसरीच्या आखाड्यात काल दोन धक्कादायक निकाल पाहायला मिळाले होते. माती विभागाच्या उपांत्य फेरीत सोलापूरच्या माऊली जमदाडेने पहिल्या धक्कादायक निकालाची नोंद केली. माऊलीने महाराष्ट्र केसरीचा गतविजेता बाला रफिक शेख याला चितपट करुन माती विभागाची अंतिम फेरी गाठली. माती विभागाच्या फायनलमध्ये शैलेश शेळकेनं चुरशीच्या लढतीत माऊली जमदाडेचा पराभव करत महाराष्ट्र केसरीची फायनल गाठली होती.
महाराष्ट्र केसरीच्या आखाड्यात अजून एक धक्कादायक निकाल पाहायला मिळाला होता. बाला रफिक शेखपाठोपाठ गतउपविजेता आणि 2018 च्या महाराष्ट्र केसरी स्पर्धेचा विजेता अभिजीत कटकेचंसुद्धा महाराष्ट्र केसरीमधलं आव्हान संपुष्टात आलं. मॅट विभागाच्या अंतिम फेरीत अभिजीतला हर्षवर्धन सदगीरकडून धक्कादायक पराभव स्वीकारावा लागला आहे. सलग चौथ्यांदा महाराष्ट्र केसरी किताबासाठी लढण्याच्या इराद्यानं मॅटवर उतरलेल्या अभिजीतला हर्षवर्धनने 5-2 अशा फरकानं हरवून सनसनाटी विजयाची नोंद केली आहे. अभिजीतवर मात करत हर्षवर्धन फायनलमध्ये पोहोचला होता.
(सविस्तर वृत्त थोड्याच वेळात...)