RR vs PBKS IPL 2025 : पंजाबचा राजस्थानवर 10 धावांनी विजय, प्लेऑफसाठी ठोकली दावेदारी

Rajasthan Royals vs Punjab Kings Live Score : सुपर संडे 18 मे रोजी आयपीएल 2025 मध्ये पहिला सामना राजस्थान रॉयल्स आणि पंजाब किंग्ज यांच्यात खेळला जात आहे.

पार्श्वभूमी

RR vs PBKS Live Updates : सुपर संडे 18 मे रोजी आयपीएल 2025 मध्ये पहिला सामना राजस्थान रॉयल्स आणि पंजाब किंग्ज यांच्यात खेळला जात आहे. या हंगामातील हा 59 वा सामना आहे. राजस्थान रॉयल्सकडे आता या हंगामात गमावण्यासारखे काहीही नाही, कारण ते आधीच प्लेऑफच्या शर्यतीतून बाहेर पडले आहेत. दुसरीकडे, पंजाब किंग्ज राजस्थानवर विजय मिळवून प्लेऑफमध्ये खेळण्याच्या आशा आणखी बळकट करण्याचा प्रयत्न करेल. राजस्थानसाठी त्यांचा नियमित कर्णधार संजू सॅमसन या सामन्यातून पुनरागमन करू शकतो.

18/05/2025 19:23:53

पंजाबचा राजस्थानवर 10 धावांनी विजय

फलंदाजांनंतर गोलंदाजांच्या चमकदार कामगिरीच्या जोरावर पंजाबने राजस्थान रॉयल्सचा 10 धावांनी पराभव करून प्लेऑफसाठीचा आपला दावा मजबूत केला. प्रथम फलंदाजी करताना पंजाबने 20 षटकांत पाच गडी बाद 219 धावा केल्या. प्रत्युत्तरात राजस्थानने 20 षटकांत सात गडी गमावून 209 धावा केल्या. राजस्थानकडून यशस्वी जयस्वाल आणि ध्रुव जुरेल यांनी अर्धशतके झळकावली, पण पंजाबने त्यांच्या गोलंदाजांच्या बळावर पुनरागमन केले.

18/05/2025 18:03:41

राजस्थानला पहिला धक्का! 14 वर्षीय वैभवच्या वादळी खेळी संपली

हरप्रीत ब्रारने वैभव सूर्यवंशीला आऊट करून राजस्थान रॉयल्सला पहिला धक्का दिला. सूर्यवंशी चांगली फलंदाजी करत होता आणि अर्धशतकाकडे वाटचाल करत होता, पण अर्धशतक पूर्ण करण्यापूर्वीच त्याने आपली विकेट गमावली. वैभव 15 चेंडूत चार चौकार आणि चार षटकारांसह 40 धावा काढून आऊट झाला. पाच षटकांनंतर राजस्थानने एका विकेटच्या मोबदल्यात 76 धावा केल्या आहेत.

18/05/2025 17:23:22

पंजाब किंग्जने राजस्थानला दिले 220 धावांचे लक्ष्य, वधेरा आणि शशांकचा धुमाकूळ

नेहल वधेरा आणि शशांक सिंग यांच्या अर्धशतकांच्या मदतीने पंजाब किंग्जने राजस्थान रॉयल्ससमोर 220 धावांचे लक्ष्य ठेवले आहे. पंजाबने 20 षटकांत पाच गडी गमावून 219 धावा केल्या. नाणेफेक जिंकून प्रथम फलंदाजी केल्यानंतर, पंजाबची सुरुवात खराब झाली. कारण त्यांनी 34 धावांत तीन विकेट गमावल्या. पण, नेहल वधेराने प्रथम संघाची धुरा हाती घेतली आणि 25 चेंडूत अर्धशतक झळकावले. तो आऊट झाल्यानंतर शशांक सिंगने तुफानी फटेकबाजी सुरू केली, ज्यामुळे पंजाबने 200 च्या पुढे धावसंख्या गाठली.

सुरुवातीच्या धक्क्यानंतर वधेराने कर्णधार श्रेयस अय्यरसोबत चौथ्या विकेटसाठी 67 धावांची भागीदारी केली. श्रेयस आऊट झाला, पण नेहल वधेरा थांबला नाही. त्याने शानदार अर्धशतक झळकावले, पण आकाश माधवालने वधेराला पॅव्हेलियनमध्ये पाठवले. वधेरा 37 चेंडूत पाच चौकार आणि पाच षटकारांसह 70 धावा काढून आऊट झाला. पण, शेवटच्या षटकांमध्ये शशांकने अझमतुल्लाह उमरझाईसोबत सहाव्या विकेटसाठी 24 चेंडूत 60 धावा जोडून पंजाबला चांगल्या स्थितीत आणले.

पंजाबकडून शशांकने 30 चेंडूत पाच चौकार आणि तीन षटकारांसह 59 धावा केल्या, तर उमरझाईने नऊ चेंडूत तीन चौकार आणि एका षटकारासह 21 धावा केल्या.

18/05/2025 15:29:56

पंजाब किंग्स संघाची प्लेइंग-11

प्रियांश आर्य, प्रभसिमरन सिंग (यष्टीरक्षक), श्रेयस अय्यर (कर्णधार), शशांक सिंग, नेहल वढेरा, मिचेल ओवेन, अजमतुल्ला ओमरझाई, मार्को जॅनसेन, झेवियर बार्टलेट, अर्शदीप सिंग, युझवेंद्र चहल. 

18/05/2025 15:29:42

राजस्थान रॉयल्स संघाची प्लेइंग-11

यशस्वी जैस्वाल, वैभव सूर्यवंशी, संजू सॅमसन, रियान पराग, शिमरॉन हेटमायर, ध्रुव जुरेल, वानिंदू हसरंगा, क्विना मफाका, तुषार देशपांडे, आकाश मधवाल, फजलहक फारुकी.

18/05/2025 15:29:24

पंजाबने नाणेफेक जिंकली...

पंजाब किंग्जचा कर्णधार श्रेयस अय्यरने राजस्थान रॉयल्सविरुद्ध नाणेफेक जिंकून प्रथम फलंदाजी करण्याचा निर्णय घेतला आहे.