Punjab Kings vs Kolkata Knight Riders : आयपीएल 2023 च्या तिसऱ्या सामन्यात पंजाब किंग्सने (Punjab Kings) कोलकाता नाईट रायडर्स (Kolkata Knite Riders) विरोधात विजयी सुरुवात केली. मोहालीत झालेल्या सामन्यात शिखर धवनच्या पंजाब (PBKS) संघाने कोलकाताचा (KKR) सात धावांनी पराभव केला. पंजाब किंग्सने डकवर्थ लुईस नियमानुसार कोलकाता नाईट रायडर्सवर सात धावांनी विजय मिळवला. त्यामुळे पंजाब संघाने यंदाच्या हंगामाची विजयी सुरुवात केली आहे. पंजाबच्या विजयाचा खरा हिरो ठरला अर्शदीप सिंह (Arshdeep Singh). त्याने भेदक गोलंदाजी करताना तीन विकेट घेतल्या.


अर्शदीप सिंहचं 'बल्ले बल्ले'


कोलकाता नाईट रायडर्सची सुरुवात अत्यंत खराब झाली. कोलकाताने अवघ्या 29 धावांत तीन विकेट गमावल्या. अर्शदीप सिंहने पहिल्याच षटकात मनदीप सिंह (2) आणि अनुकुल रॉय (4) यांना बाद केलं. अर्शदीपने तीन षटकात 19 धावांच्या मोबदल्यात तीन गडी बाद केले.


पंजाबच्या विजयात सिंहाचा वाटा, घेतल्या तीन विकेट


पंजाब किंग्सने कोलकाता नाईट रायडर्सला विजयासाठी 192 धावांचं लक्ष्य दिले होते. पंजाबच्या तगड्या गोलंदाजीमुळे कोलकाता खराब सुरुवात झाली. कोलकाताची धावसंख्या सात विकेट्सवर 146 अशी असताना पावसाला सुरुवात झाली खेळ थांबवण्यात आला. त्यानंतर डकवर्थ लुईस नियमानुसार पंजाबचा सात धावांनी विजय झाला. 






टी-20 मध्ये अर्शदीपच्या 100 विकेट्स


कोलकाता विरुद्धच्या सामन्यात कोलकाताचे तीन गडी बाद करत अर्शदीपने तुफान कामगिरी केली. यासोबतच त्याने आणखी एक विक्रम केला आहे. अर्शदीपने टी-20 मधील 100 विकेट्सचा टप्पा पार केला आहे. अर्शदीपने टी-20 मध्ये 100 गडी बाद केले आहेत. 


भानुका राजपक्षेची अर्धशतकी खेळी


भानुका राजपक्षेने कोलकाताच्या गोलंदाजांची चांगलीच धुलाई केली. राजपक्षेने अवघ्या 32 चेंडूत 50 धावा केल्या. यादरम्यान त्याने दोन षटकार आणि पाच चौकार लगावले. राजपक्षेने कर्णधार शिखर धवनसोबत 80 पेक्षा जास्त धावांची भागिदारी केली. शिखर आणि राजपक्षे यांनी मोठ्या धावसंख्येचा पल्ला गाठला.


शिखर धवनची संयमी खेळी


कर्णधार शिखर धवन याने कर्णधाराला साजेशी फलंदाजी केली. एका बाजूला प्रभसिमरन, राजपक्षे आणि जितेश शर्मा धावांचा पाऊस पाडत होते. तेव्हा धवन याने दुसरी बाजू लावून धरली होती. धवन याने संयमी 40 धावांची खेळी केली. धवन याने 29 चेंडूत 40 धावा केल्या. या खेळीदरम्यान त्याने सहा चौकार लगावले.


इतर महत्त्वाच्या बातम्या :


PBKS vs KKR, IPL 2023: पंजाबचं बल्ले बल्ले, कोलकात्यावर सात धावांनी विजय