IPL 2020, RRvsSRH: आयपीएलच्या यंदाच्या मोसमातील 40 व्या सामन्यात सनरायझर्स हैदराबादने राजस्थान रॉयल्सचा आठ गडी राखून पराभव केला. मनीष पांडे आणि विजय शंकर हे हैदराबादच्या विजयाचे हिरो ठरले. राजस्थानने दिलेलं 154 धावांचं आव्हान हैदराबादने 18.1 ओव्हरमध्ये पार केलं. हैदराबादकडून मनिष पांडेने 47 चेंडूत नाबाद 83, तर विजय शंकरने 51 चेंडूत नाबाद 52 धावा केल्या. या दोघांनीही तिसर्‍या विकेटसाठी 140 धावांची नाबाद भागीदारी केली. आजच्या विजयानंतर हैदराबादने पाचव्या स्थानी झेप घेत स्पर्धेतील आव्हान कायम ठेवलं आहे.


राजस्थाननं दिलेले आव्हानाचा पाठलाग करण्यासाठी उतरलेल्या हैदराबादची सुरुवात खराब झाली. हैदराबादचा कर्णधार डेविड वॉर्नर अवघ्या चार धावांवर बाद झाला. त्यानंतर जॉनी बेअरस्टॉ देखील 10 धावांवर बाद झाला. हेदराबादची 2 बाद 16 अशी अवस्था असताना, मनीष पांडे आणि विजय शंकर मैदानात उतरले आणि शेवटपर्यंत नाबाद राहिले. राजस्थानकडून जोफ्रा आर्चरने दोन विकेट घेतल्या.


जेसन होल्डरचा प्रभावी मारा



त्याआधी हैदराबादच्या अचूक माऱ्यासमोर राजस्थानला 20 षटकात 6 बाद 154 धावाच करता आल्या. हैदराबादकडून पहिलाच सामना खेळणाऱ्या जेसन होल्डरनं 33 धावात तीन विकेट्स घेतल्या. तर लेग स्पिनर रशिद खाननही 20 धावात एक विकेट घेऊन त्याला सुरेख साथ दिली. राजस्थानच्या संजू सॅमसननं सर्वाधिक 36 धावांचं योगदान दिलं. बेन स्टोक्सने 30 धावा, रियान परागने 20 धावा, स्टीव्ह स्मिथने 19 धावा , रॉबिन उथप्पाने 19, जोफ्रा आर्चरने 16 धावा केल्या.