IPL 2020 KKR vs MI: मुंबई इंडियन्सने कोलकाता नाईट रायडर्सवर 49 धावांनी मात करत मोसमातील पहिला विजय साजरा केला. 196 धावांच्या आव्हानाचा पाठलाग करण्यासाठी उतरलेल्या कोलकाताच्या संघाला 146 धावांपर्यंत मजल मारता आली. कोलकाताकडून पॅट कमिन्सने सर्वाधिक 33 धावा केल्या. कर्णधार दिनेश कार्तिक 30 आणि नितीश राणाने 24 धावा केल्या. मुंबईकडून पैटिनसन, राहुल चहर, ट्रेंट बोल्ट, जसप्रीत बुमराहने प्रत्येकी दोन-दोन विकेट घेतल्या. तर कायरन पोलार्डने एक विकेट घेतली.
मुंबईचा धावांचा डोंगर
त्याआधी रोहित शर्माच्या दमदार फलंदाजीच्या जोरावर मुंबई इंडियन्सनं कोलकात्यासमोर 196 धावांचं आव्हान ठेवलं होतं. रोहितनं कर्णधाराला साजेशी खेळी करताना 54 चेंडूत तीन चौकार आणि सहा षटकारांसह 80 धावा फटकावल्या. त्यानं सूर्यकुमार यादवच्या साथीनं दुसऱ्या विकेटसाठी 90 धावांची महत्वपूर्ण भागीदारी रचली. सूर्यकुमार यादवनं 47 धावांचं योगदान दिलं. त्यामुळे मुंबईला 20 षटकात पाच बाद 196 धावांचा डोंगर उभारता आला. कोलकात्याकडून शिवम मावीनं 32 धावा देत दोन विकेट्स घेतल्या.
हिटमॅनचं षटकारांचं द्विशतक
मुंबई इंडियन्सचा कर्णधार रोहित शर्मानं कोलकात्याविरुद्धच्या सामन्यात आयपीएल कारकीर्दीत 200 षटकार ठोकण्याचा पराक्रम गाजवलाय. आयपीएलमध्ये अशी कामगिरी करणारा तो आजवरचा चौथा फलंदाज ठरला. याआधी ख्रिस गेल, एबी डिव्हिलियर्स आणि महेंद्रसिंग धोनीनं आयपीएलमध्ये 200 पेक्षा जास्त षटकार ठोकले आहेत.
ख्रिस गेल- 326 षटकार
एबी डिव्हिलियर्स- 214 षटकार
एमएस धोनी - 212 षटकार
रोहित शर्मा- 200 षटकार
महागडा' पॅट कमिन्स
आयपीएलचा सर्वात महागडा खेळाडू मैदानातही 'महागडा' ठरला. कोलकाताने पॅट कमिन्सला 15 कोटी रुपये खर्चून आपल्या संघात समाविष्ट करुन घेतलं. हाच पॅट कमिन्स मुंबईविरुद्ध महागडा गोलंदाज ठऱला. कमिन्सने तीन षटकात तब्बल 49 धावा दिल्या.