Virat Kohli : विराटनं मोडला सचिनचा विक्रम, बनला सर्वात वेगवान 12 हजार धावा करणारा फलंदाज

IND vs AUS 3rd ODI : ऑस्ट्रेलियाविरुद्ध सुरु असलेल्या तिसऱ्या एकदिवसीय सामन्यात विराट कोहली नव्या विक्रमाला गवसणी घातली आहे. तिसऱ्या वनडेत 23 वी धाव घेताना विराटनं नवा इतिहास रचला. त्यानं एकदिवसीय क्रिकेटच्या इतिहासात सर्वाधिक वेगानं 12 हजार धावा करण्याचा विक्रम केला आहे. मास्टर ब्लॉस्टर सचिन तेंडुलकरचा विक्रम त्याने मोडला आहे. विराट कोहलीनं केवळ 242 इनिंगमध्ये 12 हजार धावा पूर्ण केल्या आहेत. हा विक्रम आधी सचिनच्या नावे होता. सचिननं 300 इनिंगमध्ये 12 हजार धावा केल्या होत्या.

विराट कोहलीच्या नावे हा देखील विक्रम
विराट कोहली सध्या जगातील नंबर एकचा फलंदाज आहे. विराटच्या नावे सर्वात वेगवान 8000 धावा (175 इनिंगमध्ये), 9000 रन (194 इनिंगमध्ये), 10000 रन (205 इनिंगमध्ये) और 11000 रन (222 इनिंगमध्ये) करण्याचा विक्रम देखील आहे.

एकदिवसीय क्रिकेटमध्ये विराट कोहली हाच मास्टर ब्लास्टर सचिन तेंडुलकरचे रेकॉर्ड्स तोडू शकतो असं म्हटलं जातं. एकदिवसीय क्रिकेटमध्ये धावांच्या बाबतीत केवळ सचिन तेंडुलकर (18, 426), कुमार संगकारा (14,234), रिकी पॉन्टिंग (13,704), सनथ जयसूर्या (13,430) आणि माहेला जयवर्धने (12,650) हे चारच खेळाडू विराटच्या पुढं आहेत, जे सध्या क्रिकेट खेळत नाहीत.

पॉन्टिंगचाही विक्रम मोडणार

एकूण शतकांच्या बाबतील विराट कोहली हा ऑस्ट्रेलियाच्या रिकी पॉन्टिंगचा विक्रम मोडू शकतो. पॉन्टिंगनं 560 सामन्यामध्ये 71 शतकं लगावली आहे. कोहली या विक्रमापासून एक शतक दूर आहे. जर ऑस्ट्रेलिया दौऱ्यावर कोहलीनं दोन शतकं केली तर तो पॉन्टिंगला मागे टाकू शकतो. कोहली या दौऱ्यात आणखी एक वनडे, तीन टी-20 आणि एक कसोटी सामना खेळणार आहे. या दोघांपेक्षा अधिक शतकं ही सचिनच्या नावे आहेत. सचिननं 664 सामन्यांमध्ये 100 शतकं लगावली आहेत.

आंतरराष्ट्रीय क्रिकेटमध्ये 22 हजार धावा पूर्ण

आंतरराष्ट्रीय क्रिकेटमध्ये विराट कोहलीने आतापर्यंत 418 सामन्यांमध्ये 70 शतकांसह 22,011 धावा केल्या आहेत. सचिन तेंडुलकर (34,357), कुमार संगकारा (28,016), रिकी पॉन्टिंग (27,483), माहेला जयवर्धने (25,957), जॅक कॅलिस (25,534), राहुल द्रविड (24,208) आणि ब्रायन लारा (22,358) कोहलीपेक्षा पुढं आहेत.

250 वनडे खेळणार आठवा खेळाडू

32 वर्षीय विराट कोहलीनं आपला पहिला एकदिवसीय सामना ऑगस्ट 2008 मध्ये श्रीलंकेविरुद्ध खेळला होता. या मालिकेतील दुसरा सामना खेळत असताना त्यानं 250 सामने खेळण्याचा विक्रम केला. 250 एकदिवसीय सामने खेळणारा विराट आठवा भारतीय खेळाडू ठरला. सचिन तेंडुलकर, महेंद्रसिंह धोनी, राहुल द्रविड, मोहम्मद अझहरुद्दीन, सौरव गांगुली, युवराज सिंह आणि अनिल कुंबळेनं 250 पेक्षा जास्त सामने खेळले आहेत.