बेल्जियमने सलामीच्या सामन्यात पनामाचा 3-0 असा फडशा पाडला होता. त्यापाठोपाठ ट्युनिशियालाही हरवून, बेल्जियमने बाद फेरीत धडक मारली. या सामन्यात बेल्जियमकडून इडन हाझार्ड आणि रोमेलू लुकाकू यांनी प्रत्येकी दोन दोन गोल झळकावले.
इडन हाझार्डने सहाव्या मिनिटाला मिळालेल्या पेनल्टीवर पहिल्या गोलची नोंद केली. रोमेलू लुकाकूने सोळाव्या मिनिटाला एक आणि पूर्वार्धाच्या एन्जुरी टाइममध्ये दुसरा गोल केला.
बेल्जियमचा पाचवा गोल मिची बॅटशुआयीने एन्जुरी टाइममध्ये डागला. ट्युनिशियाकडून डायलान ब्रॉनने अठराव्या आणि वाहबी काझरीने एन्जुरी टाइममध्ये एकेक गोल केला.
बेल्जियमच्या रोमेलू लुकाकूने आतापर्यंत दोन सामन्यात सर्वाधिक चार गोल झळकावले आहेत. पहिल्या सामन्यात लुकाकूने झळकावलेल्या दोन गोलच्या आधारावर बेल्जियमने पनामावर 3-0 ने विजय मिळवला होता.