T20 World Cup 2024 IND vs BAN: भारतीय संघाने टी-20 विश्वचषक 2024 मध्ये (T20 World Cup 2024) उपांत्य फेरीचं तिकीट पक्कं केलं आहे. सुपर एटच्या दुसऱ्या सामन्यात भारताने आज बांगलादेशचा 50 धावांनी दणदणीत पराभव केला. भारताच्या 197 धावांच्या आव्हानाला उत्तर देताना बांगलादेशला भारताने 8 बाद 146 असं रोखलं. कुलदीप यादवने तीन तर अर्शदीप आणि बुमराने प्रत्येकी दोन विकेट्स घेत बांगलादेशच्या फलंदाजांचं कंबरडं मोडलं.


विजयानंतर कर्णधार रोहित शर्मा काय म्हणाला?


प्रथम फलंदाजी करताना रोहित शर्मासह सर्वच फलंदाजांनी आक्रमक पवित्रा घेतला होता. एकीकडे विकेट्स जात होत्या. मात्र आक्रमक फलंदाजीचा पवित्रा भारतीय फलंदाजांनी सोडला नाही. सामना जिंकल्यानंतर यावर रोहित शर्माने भाष्य केलं. रोहित शर्मा म्हणाला की, माझ्या मते तरी टी-20 मध्ये अर्धशतके आणि शतके झळकावण्याची गरज नाही, तुम्ही गोलंदाजांवर किती दबाव टाकता हे महत्त्वाचे आहे. सर्व फलंदाज सुरुवातीपासून असेच खेळत आले आहेत आणि आम्हालाही असंच खेळत राहायचं आहे. संघात खूप अनुभवी खेळाडू आहेत आणि संघ त्यांना पाठिंबा देतो, असं रोहित म्हणाला.






हार्दिक हा हार्दिक आहे- रोहित शर्मा


आम्ही परिस्थितीशी जुळवून घेतलं आहे. आम्ही खरोखरच चांगले खेळलो. इथे वाऱ्याचा प्रभाव आहे, मात्र आम्ही हुशारीने खेळत आहोत. आठही फलंदाजांना त्यांची भूमिका पार पाडायची आहे. एकूणच आम्ही फलंदाजी आणि गोलंदाजीत चांगली कामगिरी केली. हार्दिक हा हार्दिक आहे, आम्हाला माहित आहे की तो काय करण्यास सक्षम आहे. तो संघासाठी खूप महत्त्वाचा खेळाडू आहे. तो अशीच कामगिरी करत राहिल आणि संघाला एका चांगली धावसंख्या गाठण्यात मदत करेल, असं म्हणत रोहित शर्माने हार्दिक पांड्याचं कौतुक केलं.






भारताचे उपांत्य फेरीतील स्थान निश्चित -


भारताचे उपांत्य फेरीतील स्थान जवळपास निश्चित झालेय. भारताच्या नावावर चार गुण आहेत, त्याशिवाय नेटरनरेटही जबरदस्त आहे. अफगाणिस्तानला ऑस्ट्रेलिया आणि बांगलादेशविरोधात अतिशय मोठ्या फराकाने विजय मिळवावा लागेल. तसेच ऑस्ट्रेलियाने भारताचा दारुण पराभव करावा लागेल, तेव्हाच अफगाणिस्तान उपांत्य फेरीत जाऊ शकतं. सध्या तशी शक्यता दिसत नाही.  अफगाणिस्तान आणि ऑस्ट्रेलिया यांच्यातील सामना रविवारी सकाळी होणार आहे. या सामन्यात अफगाणिस्तानने विजय मिळवल्यास ऑस्ट्रेलियाचं स्पर्धेतील आव्हान खडतर होऊ शकतं. 


किंग कोहलीचा विराट रेकॉर्ड-


विराट कोहलीने (Virat Kohli) विश्वचषकात आणखी एक रेकॉर्डला गवसणी घातली आहे. बांगलादेशविरोधात 37 धावांची छोटेखानी खेळत करत विराट कोहलीने मोठा विक्रम केला आहे. विराट कोहलीने विश्वचषकात (वनडे-टी20) तीन हजार धावा पूर्ण करण्याचा विक्रम केला आहे. बांगलादेशविरोधात विराट कोहलीनं या रेकॉर्डवर शिक्कामोर्तब केलेय. विश्वचषकात तीन हजार धावा करणारा विराट कोहली पहिला फलंदाज ठरला.