हैदराबाद : चेन्नई सुपर किंग्जचा वेगवान गोलंदाज अंशुल कंबोज यानं सय्यद मुश्ताक अली ट्रॉफीत हरियाणाकडून खेळताना भारताचा सलामीवीर अभिषेक शर्माला दोनवेळा बाद केलं. हरियाणा आणि पंजाब यांच्यातील सामन्याचा निकाल सुपर ओव्हरमध्ये लागला. यात हरियाणानं बाजी मारली. हरियाणानं पहिल्यांदा फलंदाजी करताना 9 बाद 207 धावा केल्या होत्या. पंजाबचा संघ देखील 7 बाद 207 धावा करु शकला. यामुळं मॅचचा निकाल सुपर ओव्हरमध्ये लागला, यामध्ये हरियाणानं बाजी मारली.
हरियाणाच्या संघानं पहिल्यांदा फलंदाजी केली. यामध्ये कॅप्टन अंकित कुमारनं 26 बॉलमध्ये 51 धावा केल्या. तर, निशांत सिंधू यानं 32 बॉलमध्ये 61 धावा केल्या. 13 ओव्हर संपण्यापूर्वीच हरियाणानं 140 धावांचा टप्पा पार केला होता. सुमित कुमारनं 14 बॉलमध्ये 28 धावांची खेळी केली. त्यामुळं हरियाणानं 20 ओव्हरमध्ये 9 बाद 207 धावा केल्या. पंजाबकडून अश्विनी कुमारनं 31 धावा देत तीन विकेट घेतल्या.
अंशुल कंबोज यानं पंजाबच्या संघाला सुरुवातीला दोन धक्के दिले. अभिषेक शर्माला 6 धावा आणि प्रभासिमरन सिंह याला 20 धावांवर बाद केलं. पंजाबनं 28 धावांवर दोन विकेट गमावल्या होत्या. यानंतर अनमोलप्रीत सिंह यानं 37 बॉलमध्ये 81 धावांची आक्रमक खेळी करत पंजाबला मॅचमध्ये परत आणलं. अनमोलप्रीत सिंहनं सलील अरोरा सोबत 68 धावांची भागीदारी केली. सलील अरोरा 22 धावा करुन बाद झाला. यानंतर सनवीर यानं 30 धावा, रमनदीपनं 13 धावा, हरप्रीत ब्रारनं 10 धावा केल्यानं पंजाबच्या संघानं 20 ओव्हरमध्ये 7 बाद 207 धावा केल्या. हरियाणाकडून अंशुल कंबोजनं 26 धावांवर 2 विकेट, जाखडनं 37 धावा 2 विकेट, युजवेंद्र चहलनं 40 धावा देत दोन विकेट काढल्या.
सुपर ओव्हरमध्ये पंजाबचा संघ पहिल्यांदा फलंदाजीला आला. अंशुल कंबोजनं पहिल्या तीन बॉलमध्येच अभिषेक शर्मा आणि सनवीर सिंह यांना बाद केलं. हरियाणाला विजयासाठी दोन धावा करायच्या होत्या, निशांत सिंधून चौकार मारत हरियाणाला विजय मिळवून दिला.
पुदूचेरीकडून बडोद्याचा पराभव
पुदूचेरीनं सय्यद मुश्ताक अली ट्रॉफी स्पर्धेत बडोद्याचा 17 धावांनी पराभव केला. अमन खानच्या 72 धावांच्या जोरावर पुदूचेरीनं 9 बाद 166 धावा केल्या होत्या. बडोद्याच्या राज लिंबानीनं 35 धावा देत 3 विकेट घेतल्या.बडोद्याकडून शिवालिक शर्मानं 56 धावा केल्या. मात्र, आदिल टुंडानं 4 विकेट घेतल्यानं बडोद्याचा संघ 18. 5 ओव्हरमध्ये 149 धावा करु शकला.