Karun Nair Century India A vs England Lions : काही दिवसांपूर्वीच विराट कोहलीने कसोटी क्रिकेटमधून निवृत्ती घेतली. विराट कोहली रेड बॉल फॉरमॅटमध्ये नंबर-4 वर फलंदाजी करायचा, पण त्याच्या निवृत्तीनंतर विराटची जागा कोण घेईल, हा मोठा चर्चेचा विषय बनला आहे. आता टीम इंडियाच्या इंग्लंड दौऱ्यापूर्वी करुण नायरने दमदार शतकी खेळी खेळून विराट कोहलीची जागा घेण्याचा दावा केला आहे.
विराट कोहलीची जागा कोण घेणार?
इंडिया अ आणि इंग्लंड लायन्स यांच्यातील पहिला प्रथम श्रेणी सामना 30 मे रोजी सुरू झाला. या सामन्यात टीम इंडियाला प्रथम फलंदाजीसाठी आमंत्रित करण्यात आले होते. यशस्वी जैस्वाल आणि कर्णधार अभिमन्यू ईश्वरन मोठी धावसंख्या उभारू शकले नाहीत, परंतु करुण नायरने दमदार शतक ठोकून विराटची जागा घेण्याचा दावा केला आहे. करुण नायरने 155 चेंडूत आपले शतक पूर्ण केले.
अलिकडेच, दिग्गज क्रिकेटपटू सुनील गावसकर यांनी असे सुचवले होते की, नायर कसोटीत विराट कोहलीचा चांगला पर्याय ठरू शकतो. करुण नायरने इंग्लंड लायन्सविरुद्धच्या सामन्यात तिसऱ्या क्रमांकावर फलंदाजी केली, परंतु तो सहसा चौथ्या क्रमांकावर फलंदाजी करतो. हा लेख लिहिताना त्याने 246 चेंडूत 186 धावा केल्या आहेत.
सरफराजसोबत 181 धावांची भागीदारी
करुण नायर व्यतिरिक्त, सरफराज खान इंग्लंड लायन्सविरुद्धच्या सामन्यात चमकला. ज्याने इंग्लंड दौऱ्यासाठी टीम इंडियामध्ये स्थान मिळालेले नाही. नायर आणि सरफराजमध्ये 181 धावांची मोठी भागीदारी झाली. सरफराज खानने 119 चेंडूत 92 धावांची खेळी खेळली. करुण नायरने 2017 मध्ये भारतासाठी शेवटची कसोटी खेळली होती, आता या शतकी खेळीच्या जोरावर त्याने 7 वर्षांनंतर टीम इंडियामध्ये पुनरागमन केले आहे.
इंग्लंड दौऱ्यासाठी भारतीय संघ : शुभमन गिल (कर्णधार), ऋषभ पंत (उपकर्णधार), यशस्वी जैस्वाल, केएल राहुल, साई सुदर्शन, अभिमन्यू ईश्वरन, करुण नायर, नितीश रेड्डी, रवींद्र जडेजा, ध्रुव जुरेल, वॉशिंग्टन सुंदर, शार्दुल ठाकूर, जसप्रीत बुमराह, मोहम्मद सिराज, प्रसिद्ध कृष्णा, आकाश दीप, अर्शदीप सिंग, कुलदीप यादव.