IND vs PAK Asia Cup 2023 : भारत आणि पाकिस्तान यांच्यामध्ये आशिया चषकात पुन्हा एकदा थरार रंगणार आहे. रविवारी 10 सप्टेंबर रोजी कोलंबो येथे भारत आणि पाकिस्तान यांच्यात महामुकाबला रंगणार आहे. आशिया चषकातील भारत आणि पाकिस्तान यांच्यात झालेल्या सामन्यात पावसाने खोडा घातला होता. आता रविवारी होणाऱ्या सामन्यातही पावसाचे ढग ओढावले आहेत. Accuweather च्या वृत्तानुसार, रविवारी कोलंबोमध्ये पावसाची शक्यता 75 टक्के इतकी आहे. आशिया चषकात दुसऱ्यांदा भारत आणि पाकिस्तान यांच्यातील सामना रद्द होणार का? अशा चर्चा रंगल्या आहेत.
रविवारी दुपारी कोलंबोमध्ये 99 टक्के ढगाळ वातावरणाचा अंदाज वर्तवण्यात आला आहे. दुपारी अडीच वाजता पावसाची शक्यता 77 टक्के असेल... तर सायंकाळी 80 टक्के पाऊस कोसळू शकतो. Accuweather च्या रिपोर्ट्सनुसार, दिवसभर मुसळधार पावसाची शक्यता वर्तवण्यात आली आहे. त्यामुळे भारत आणि पाकिस्तान यांच्यातील हायव्होल्टेज सामना होणार का ? अशी चर्चा रंगली आहे.
पहिल्या सामन्यात काय झाले होते.. ?
शनिवारी, दोन सप्टेंबर रोजी भारत आणि पाकिस्तान यांच्यात सामना झाला होता. भारताने नाणेफेक जिंकून प्रथम फलंदाजी करण्याचा निर्णय घेतला होता. पण पाकिस्तानच्या वेगवान तिकडीसमोर भारताच्या फलंदाजांची भंबेरी उडाली होती. भारताची आघाडीची फळी 15 षटकांच्या आत तंबूत परतली होती. एकवेळ भारताची अवस्था 4 बाद 66 अशी दयनीय झाली होती. रोहित शर्मा, विराट कोहली, श्रेयस अय्यर आणि शुभमन गिल स्वस्तात माघारी परतले होते. भारतीय संघ 150 धावांपर्यंत पोहचणार का ? अशी स्थिती निर्माण झाली होती. पण इशान किशन आणि हार्दिक पांड्या यांनी जिगरबाज खेळी करत भारताचा डाव सावरला होता. हार्दिक पांड्याने 87 धावांची झुंजार खेळी केली होती. तर इशान किशन याने 82 धावांचे वादळी योगदान दिले होते. हार्दिक पांड्या आणि इशान किशन या जोडीने पाचव्या विकेटला 138 धावांची भागिदारी केली. हार्दिक आणि इशान या जोडीच्या बळावर भारतीय संघाने 266 धावसंख्येपर्यंत मजल मारली होती. पण त्यानंतर पावसाने खोडा घातल्यामुळे सामना रद्द करावा लागला होता. आता पुन्हा एकदा भारत आणि पाकिस्तान यांच्यात लढत होणार आहे. पाकिस्तानच्या वेगवान माऱ्याला भारतीय फलंदाज कसे तोंड देणार? हे पाहणं औत्सुक्याचे ठरणार आहे. शाहीन आफ्रिदी, हॅरिस रौफ आणि नसीम शाह या वेगवान तिकडीने पहिल्या सामन्यात भारताचा संपूर्ण संघ तंबूत धाडला होता. आता 10 सप्टेंबर रोजी भारत आणि पाकिस्तान यांच्यातील लढतीकडे सर्वांचे लक्ष लागलेय.
भारताचे सुपर 4 फेरीचे वेळापत्रक -
ग्रुप अ आणि ब मधील आघाडीचे दोन संघ सुपर 4 साठी पात्र होतील. ग्रुप अ मधून भारत आणि पाकिस्तान संघाने सुपर 4 मध्ये पात्र झाले आहेत. ग्रुप ब मध्ये श्रीलंका आणि बांगलादेश संघाने सुपर 4 मध्ये प्रवेश केला आहे. सुपर 4 मध्ये प्रत्येक संघाचे तीन सामने होणार आहेत. आघाडीच्या दोन संघामध्ये फायनलचा थरार होणार आहे. 10 सप्टेंबर रोजी भारत आणि पाकिस्तान यांच्यामध्ये लढत होणार आहे. दुसरा सामना 12 सप्टेंबर रोजी आणि अखेरचा लाममा 15 सप्टेंबर रोजी होणार आहे.
पाहा सुपर 4 फेरीचे वेळापत्रक
| 6 सप्टेंबर 2023 | 2 (सुपर - 4) | पाकिस्तान vs बांगलादेश | लाहोर, पाकिस्तान | दुपारी 3 वाजता |
| 9 सप्टेंबर 2023 | 2 (सुपर - 4) | श्रीलंका vs बांगलादेश | कोलंबो, श्रीलंका | दुपारी 3 वाजता |
| 10 सप्टेंबर 2023 | 2 (सुपर - 4) | पाकिस्तान vs टीम इंडिया | कोलंबो, श्रीलंका | दुपारी 3 वाजता |
| 12 सप्टेंबर 2023 | 2 (सुपर - 4) | टीम इंडिया vs श्रीलंका | कोलंबो, श्रीलंका | दुपारी 3 वाजता |
| 14 सप्टेंबर 2023 | 2 (सुपर - 4) | पाकिस्तान vs श्रीलंका | कोलंबो, श्रीलंका | दुपारी 3 वाजता |
| 15 सप्टेंबर 2023 | 2 (सुपर - 4) | टीम इंडिया vs बांगलादेश | कोलंबो, श्रीलंका | दुपारी 3 वाजता |
| 17 सप्टेंबर 2023 | फायनल | S4 1 vs S4 2 | कोलंबो, श्रीलंका | दुपारी 3 वाजता |