Eng vs SA 2nd T20: मँचेस्टरमधील ओल्ड ट्रॅफर्ड येथे खेळवण्यात आलेल्या दक्षिण आफ्रिकेविरुद्धच्या दुसऱ्या टी-20 आंतरराष्ट्रीय सामन्यात इंग्लंडने (Eng vs SA) अनेक ऐतिहासिक विक्रम मोडले. हॅरी ब्रुकच्या नेतृत्वाखालील संघ टी-20 मध्ये 300 धावांचा टप्पा ओलांडणारा जगातील तिसरा तर आयसीसीचे पूर्ण सदस्य असलेला पहिला संघ ठरला आहे. दक्षिण आफ्रिकेविरुद्धच्या टी-20 सामन्यात इंग्लंडने 20 षटकांत दोन विकेट्स गमावत 304 धावा केल्या.
इंग्लंडकडून फिल सॉल्टने 39 चेंडूत शतक झळकावले. इंग्लंडकडून 39 चेंडूत शतक झळकवणारा फिल सॉल्ट पहिलाच खेळाडू ठरला. तर 60 चेंडूत 15 चौकार आणि 8 षटकारांसह फिल सॉल्ट नाबाद 141 धावांची विक्रमी खेळी खेळली. तर जॉस बटलरने 30 चेंडूत 83 धावांची आक्रमक खेळी खेळली, ज्यामध्ये 8 चौकार आणि 7 षटकारांचा समावेश होता.
इंग्लंडने भारताचा विक्रम मोडला-
इंग्लंडने टी-20 आंतरराष्ट्रीय सामन्यात संघाच्या एकूण धावसंख्येच्या बाबतीत भारतीय संघाचा विक्रम मोडला. 12 ऑक्टोबर 2024 रोजी हैदराबादमध्ये बांगलादेशविरुद्ध भारताने 6 विकेट्स गमावून 297 धावा केल्या होत्या. तथापि, एकूणच टी-20 आंतरराष्ट्रीय सामन्यात हा तिसरा सर्वोच्च धावसंख्या आहे. 23 ऑक्टोबर 2024 रोजी झिम्बाब्वेने गांबियाविरुद्ध 4 गडी गमावून 344 धावा केल्या, तर नेपाळने मंगोलियाविरुद्ध 3 विकेट्स गमावून 314 धावांची मोठी धावसंख्या उभारली होती.
इंग्लंडकडून दक्षिण आफ्रिका 146 धावांनी पराभूत-
सामन्यात मोठ्या धावसंख्येचा पाठलाग करण्यासाठी उतरलेला दक्षिण आफ्रिकेचा संघ 16.1 षटकात 158 धावांवरच गारद झाला. दक्षिण आफ्रिकेकडून कर्णधार एडेन मार्करामने 20 चेंडूत 2 चौकार आणि 4 षटकारांसह 41 धावांची सर्वाधिक खेळी केली, तर ब्योर्न फोर्टुइनने 16 चेंडूत 32 धावा केल्या. बेबी एबी म्हणून प्रसिद्ध असलेला डेवाल्ड ब्रेव्हिस 4 धावा काढून बाद झाला, तर इतर फलंदाज चांगली कामगिरी करू शकले नाहीत. इंग्लंडकडून जोफ्रा आर्चरने 3 विकेट्स घेतल्या. तर सॅम करन, विल जॅक्स आणि लियाम डॉसन यांनी प्रत्येकी 2-2 विकेट्स पटकावल्या. अशाप्रकारे, इंग्लंडने दक्षिण आफ्रिकेला 146 धावांनी हरवून मालिका 1-1 अशा बरोबरीत आणली आहे.